शपथ लिएलगत्तै नवनियुक्त परराष्ट्र मन्त्री डा. नारायण खड्का नेतृत्वको नेपाली टोली संयुक्त राष्ट्रसंघीय महासभामा भाग लिन बुधवार अमेरिकाको न्यूयोर्क प्रस्थान गर्ने भएको छ ।

राष्ट्रपति भवन शितल निवासमा मन्त्री पदको शपथ लगत्तै सिंहदरबारमा कार्यभार सम्हाल्ने र आजै अमेरिका जाने कार्यक्रम तय भएको हो । महासभामा जाने ४ सदस्यीय टोलीको नेतृत्व मन्त्री खड्काले गर्नेछन् ।

मन्त्री खड्काको नेतृत्वमा परराष्ट्र सचिव भरतराज पौड्याल, मन्त्रालयमा संयुक्त राष्ट्रसंघ महाशाखा हेर्ने सह–सचिव सेवा लम्साल र एक जना अधिकृत नेपाली प्रतिनिधि मण्डलमा सहभागी हुनेछन् ।

न्युयोर्कस्थित राष्ट्रसंघीय स्थायी नियोगका अधिकारी पनि प्रतिनिधि मण्डलमा सहभागी हुनेछन् । 

अमेरिकाका लागि नेपाली राजदूत डा. युवराज खतिवडालाई फिर्ता बोलाउने निर्णय भइसकेकाले उनी सहभागी हुन पाउने छैनन् । 

महासभालाई परराष्ट्रमन्त्री खड्काले सेप्टेम्बर २७ (असोज) ११ मा सम्बोधन गर्ने सम्भावना रहेको परराष्ट्र प्रवक्ता सेवा लम्सालले लोकान्तरलाई जानकारी दिइन् ।

‘प्रधानमन्त्रीको लेभलमा सहभागी भएको भए २५ तारिखमा सम्बोधन हुन्थ्यो, मन्त्रीस्तरमा सहभागी हुँदा २७ तारिखमा हुनसक्छ,’ लम्सालले लोकान्तरसँग भनिन् । 

महासभामा हुने अन्य बहुपक्षीय बैठकमा सहभागी हुनुपर्ने भएकाले नेपाली प्रतिनिधि मण्डल असोज ११ गतेपछि मात्र स्वदेश फर्किने छ ।

२८ तारिखमा मन्त्री सहभागी हुने अन्तिम कार्यक्रम छ । 

पढ्नुहोस्, यो पनि :

ओलीजीले महेन्द्रले झैँ ‘कार्ड’ खेल्नुभयो, छिमेकीलाई हामी ब्यालेन्स गर्छौंः डा. नारायण खड्का [अन्तर्वार्ता]

महासभामा सरकार प्रमुखले सहभागिता जनाउने परम्परा रहेकोमा देशभित्रको राजनीतिक अवस्थाका कारण प्रधानमन्त्री शेरबहादुर देउवा सहभागी नहुने भएका हुन् ।

राष्ट्रसंघीय महासभाका दौरानमा मन्त्री खड्काले मित्रराष्ट्रका समकक्षी तथा सरकार प्रमुखहरूसँग पनि भेटवार्ता गर्ने तयारी रहेको स्रोतले बतायो । 

प्रधानमन्त्री देउवा महासभामा सहभागी हुन नसक्ने भएपछि एकैपटक गर्ने भनिएको मन्त्रिपरिषद् विस्तार रोकेर खड्कालाई मन्त्री बनाइएको हो ।

उदयपुरबाट प्रतिनिधि सभामा प्रत्यक्ष निर्वाचित खड्का परराष्ट्र मामिलामा दख्खल राख्ने नेता पनि मानिन्छन् ।