अमेरिका, बेलायत र अस्ट्रेलियाबीच अस्ट्रेलियालाई आणविक ऊर्जायुक्त पनडुब्बी उपलब्ध गराउने सम्झौता गैरजिम्मेवार काम भएको र यसले देशलाई विभिन्न मोर्चामा जोखिम तेर्स्याएको अस्ट्रेलियाका ट्रेड युनियनहरूले जनाएका छन् । 

गत साता घोषणा गरिएको त्रिपक्षीय सम्झौताले अस्ट्रेलियालाई आणविक ऊर्जायुक्त तर परम्परागत हतियारसहितको पनडुब्बी उपलब्ध गराउन लागेको हो । यस सम्झौतालाई विश्वव्यापी निन्दा गरिएको छ । 

सम्झौताका कारण फ्रान्सले ६६ अर्ब डलर बराबरको डिजेलबाट चल्ने पनडुब्बी अस्ट्रेलियालाई बेच्न पाएन । त्यसैले यो कदम आफ्नो पिठ्युँमा छुरा हानेको जस्तो भएको फ्रान्सको गुनासो छ । 

अस्ट्रेलियामै पनि धेरैजना यस अकिस सम्झौताबाट खुशी छैनन् । देशका दुई प्रमुख ट्रेड युनियनहरूले सम्झौताका विषयमा कठोर शब्द प्रयोग गरेका छन् । प्रधानमन्त्री स्कट मोरिसनले सम्झौता गरेकोलाई पनि उनीहरूले आलोचना गरेका छन् । 

बन्दरगाहमा काम गर्ने कामदारहरूको मेरिटाइम युनिय अफ अस्ट्रेलियाले अकिस सम्झौताबाट आफू पूरै विपरीत रहेको बताए । 

कोभिड महामारी चलिरहेको बेलामा मोरिसनले खोपको आपूर्ति सुरक्षित पार्न तथा लकडाउनका कारण अप्ठ्यारोमा परेका अस्ट्रेलियालीहरूलाई सहायता गर्नुको साटो गोप्य सैन्य सम्झौता गरेको उक्त ट्रेड युनियनले लेख्यो । 

अकिस सम्झौताले चीनसँग अनावश्यक द्वन्द्व चर्काउने चेतावनी पनि युनियनले दिएको छ । 

यस सम्झौताका कारण अस्ट्रेलियाली सरकार आणविक हतियार प्राप्त गर्नका लागि प्रेरित हुन सक्ने आशंका पनि युनियनले गरेको छ । ‘पनडुब्बीहरूमा प्रवर्धित युरेनियमको उपयोग गरिनेछ जुन आणविक हतियारहरूका लागि आदर्श हो,’ युनियनले भन्यो । 

यस्तै किसिमको धारणा इलेक्ट्रिकल ट्रेड्स युनियन अफ अस्ट्रेलियाले पनि राखेको छ । अकिसमा सहभागी हुने क्यानबेराको निर्णय धोका भएको उसको भनाइ छ ।