काठमाडौं उपत्यकाको एक ‘भीआईपी’ बस्ती भैंसेपाटी जाने बाटो– जहाँबाट राजनीतिक दलका प्रभावशाली नेता, पूर्वमन्त्रीहरू, विभिन्न देशका राजदूत र नीति निर्माता समेत दैनिक ओहोरदोहर गर्छन् । त्यो भीआईपी बस्ती जाने बाटोमा सर्वसाधारण जनता भने सास्ती व्यहोरी रहेका छन् । 

यही रुटमा दैनिक ओहोर दोहोर गर्ने सवारीका चालकहरू बाटो झन्झन् खराब बन्दै गइरहेको बताउँछन् । 

पानी परेर बाटो चिप्लो बनेको समयमा दुईपाङग्रे सवारी साधन बारम्बार दुर्घटनामा पर्ने गरेको भुक्तभोगीहरू बताउँछन् । 

भैँसेपाटी सडकमा देखिएको बिजोग नेपालका विकास आयोजना कसरी अलपत्र परेका छन् भन्ने ज्वलन्त उदाहरण हो । नख्खुखोला– भंैसेपाटी–स्रोहखुट्टे–बुङमति सडक ठेक्का लागेको ५ वर्ष भइसक्यो तर सडकको दुरावस्ता भने झनै बिग्रिएको छ । 

पूर्ववर्ती केपी शर्मा ओली सरकारका चारजना मन्त्री यही बाटो भएर दैनिक ओहोरदोहोर गरे । 

ओली सरकारमा भौतिक पूर्वाधार तथा निर्माण मन्त्री बनेको रघुवीर महासेठको आँगनमुनि यस्तो बिजोग छ, तर उनले यो बाटो बनाउन कुनै पहल गरेनन् । 

यही बाटो भएर तत्कालीन संघीय मामिला तथा सामान्य प्रशासन मन्त्री हृदयेश त्रिपाठी, तत्कालीन अर्थमन्त्री विष्णु पौडेल र तत्कालीन महिला बालबालिका तथा समाज कल्याण मन्त्री जुली महतो हिँडे ।

नेकपा एमालेको उपाध्यक्षबाट राजीनामा गरेका पूर्व उपप्रधानमन्त्री वामदेव गौतम पनि यही बाटो साइरन बजाउँदै हिँड्छन् । 

अर्थमन्त्री रहेको समयमा विष्णु पौडेलले ठेक्का लगाउने सरकारी निकायका प्रतिनिधिहरूलाई छिटो काम सक्न निर्देशन दिएपनि काम हुन सकेन ।

राष्ट्रिय राजनीतिका प्रभावशाली व्यक्तिहरू बस्ने ठाउँको बाटोको यो विजोगले स्थानीयलाई आक्रोशित बनाएको छ । 

सडक निर्माणमा ढिलाइ भएको भन्ने स्थानीयको गुनासोका कारण जनप्रतिनिधि आजित छन् । तर निर्माणको जिम्मा पाएको ठेकेदार आशिश बिरुवा सीएम जेभीले काम अलपत्र पार्दा यो क्षेत्रबाट हिँड्ने सर्वसाधारणले सास्ती भोगिरहेका छन् ।

२०७३ असार ३० गते भएको सम्झौता अनुसार २०७५ असार मसान्तमा सडक जिम्मा लगाइसक्नु पर्ने हो । ३० करोड लागत रहेको यो सडकको ठेकेदारले २० करोड २२ लाख रुपैयाँ भुक्तानी लिइसकेको छ । तर बाटोको अवस्था विस्तारको काम शुरू गर्नुअघि भन्दा पनि खराब भएको छ । 

भैंसेपाटीको उकालोमा सडकमै ठूलो खाल्डो परेको छ । त्यहीँ नजिकै म्यानमारको राजदूतावास छ ।

कतार र इजिप्टको दूतावास पनि यही बाटो भएर जानुपर्छ ।