नेपाली कांग्रेस सभापति एवं प्रधानमन्त्री शेरबहादुर देउवाले कांग्रेसलाई कसैले हराउँछ भने पार्टीभित्रैबाट मात्र हराउन सकिने बताएका छन् । उनले भने, ‘कांग्रेस एक भएको खण्डमा कसैले पनि हराउन सक्दैन । हाम्रो पार्टीलाई हराउँछ भन्ने आफैंले हराउने हो । यदि हामी एक भयौँ भने संसारको कुनै पनि तागतले हराउन सक्दैन ।’

नेपाली कांग्रेस पोखरा महानगरपालिका–१७ ले आइतवार आयोजना गरेको दशैं तिहारको शुभकामना आदानप्रदान एवं सम्मान कार्यक्रममा बोल्दै सभापति देउवाले सो कुरा बताएका हुन् ।

उनले पार्टीको महाधिवेशन मिति नजिकिएको उल्लेख गर्दै सबै जना एक भएर अघि बढ्नुपर्ने सुझाव दिए । उनले भने, ‘चुनावमा हारजीत हुन्छ । पार्टीभित्रको चुनावी परिणामलाई तिक्तताको रुपमा लिनु हुँदैन । जित्ने पनि मात्तिने काम गर्नु हुँदैन । हार्नेले पनि सहज रुपमा हार स्वीकार गर्नुपर्छ ।’

कांग्रेस प्रजातान्त्रिक पार्टी भएको दोहोर्‍याउँदै उनले प्रजातान्त्रिक तरिकाबाट चुनावमा स्वस्थ प्रतिस्पर्धा हुने बताए । ‘पार्टी सभापतिसहित पदाधिकारीमा भरसक सहमति हुनुपर्छ । नसके प्रजातान्त्रिक तरिकाबाट स्वस्थ प्रतिस्पर्धा हुनेछ,’ देउवाको भनाइ थियो । 

उनले पोखरा गण्डकी प्रदेशको राजधानी मात्र नभई नेपालकै पर्यटकीय राजधानी भएको बताए । उनले कोरोनाले थलिएको यहाँको पर्यटन क्षेत्र अब बिस्तारै चलायमान हुँदै जाने अपेक्षा समेत गरे । 

पार्टीलाई ५० लाख रूपैयाँ चन्दा दिएका पोखरा १७ निवासी समाजसेवी लीलाभक्त आचार्यबाट सबैले प्रेरणा लिनुपर्ने बताए । उनले भने, ‘अरूले पार्टीबाट के लिने भन्ने सोच्छन्, तर उहाँले पार्टीलाई नै यति ठूलो रकम सहयोग गर्नुभएको छ । उहाँबाट प्रेरणा लिनुपर्छ ।’ त्यसक्रममा आचार्यलाई सभापति देउवाले सम्मान गरेका थिए । 

कार्यक्रममा गण्डकी प्रदेश मुख्यमन्त्री कृष्णचन्द्र नेपाली पोखरेल, नेपाली कांग्रेस कास्की सभापति कृष्ण केसीलगायतले सम्बोधन गरेका थिए । 

गण्डकीलाई पूर्ण साक्षर प्रदेश घोषणा समारोहका लागि आएका पार्टी सभापति एवं प्रधानमन्त्री देउवा आइतवार पोखरामै बस्ने छन् । उनले साँझ राष्ट्र बैंक गेस्ट हाउसमा कार्यकर्ता भेट गरी सोमवार बिहान पोखरा क्षेत्रीय अन्तर्राष्ट्रिय विमानस्थल अवलोकन गरी काठमाडौं फर्किने तालिका छ ।