सोमवार मोरङको धनपालथान गाउँपालिकास्थित कर्सिया बजारको सिटिजन्स बैंक लुटपाट घटनामा भारतीय कुख्यात डाँकु समूहको संलग्नता रहेको खुलेको छ ।

भारतीय प्रहरीको ‘वान्टेड’ सूचीमा रहेकाहरूबाट बैंक लुटपाटको घटना भएको जिल्ला प्रहरी कार्यालय मोरङका एसपी जनार्दन जिसीले बताए । ८ जनाको समूहमा आएका लुटेराले बैक लुटपाट गरेको प्रहरीले जनाएको छ ।

शुरूमा ५ जना मात्रै भए पनि जम्मा ८ जनाको संलग्नता देखिएको प्रहरीले जनाएको छ । जिसीका अनुसार मुख्य योजनाकार विराटनगरका मुनाल पथका एक पुरुष रहेको खुलेको छ ।

लुटपाटमा संलग्न अन्य सबै भारतीय नागरिक हुन् । बयानमा डाँकुहरूले एकअर्कालाई नचिनेको जनाएका छन् । एकअर्कालाई नचिने पनि मुख्य योजनाकार श्याम मुखियालाई चिनेको बताएको जिसीले जानकारी दिए । 

मुखियाले ऋण तिर्न भारतबाट डाँकुहरूलाई बोलाएको जनाइएको छ । ‘ऋण छ, बैंक लुटपाट गरेर बाँडेर खाउँला भनेर बोलाएको खुलेको छ,’ एसपी जिसीले भने । 

बैंक लुटपाटमा ३ जनालाई मोरङ प्रहरीले नियन्त्रणमा लिइसकेको छ । पक्राउ पर्नेमा मुख्य योजनाकार श्याम मुखिया, विजय सहनी र मुनाल यादव रहेका छन् । मुख्य योजनाकार मुखियाले ठेगाना समेत भारत भनेर ढाँटेको र पछि अनुसन्धानका क्रममा उनी विराटनगर निवासी रहेको खुलेको एसपी जिसीले बताए । 

बैंकका कर्मचारीले राति १० बजेसम्म हिसाब गरेर २१ लाख ७० हजार ५६३ रुपैयाँ नभएको जनाएका छन् । बैकबाट पैसा लुटिए पनि कति लुटिएको भन्ने अझै यकिन भई नसकेको प्रहरीले जनाएको छ ।

बैंकभित्र प्रवेश गर्दा सुरक्षा गार्ड शितल कुँवरले डाँकुहरूलाई रोक्ने प्रयास गरेका थिए । कुँवरले रोक्न खोज्दा लुटेरा समूहले पेस्तोल देखाएको थियो । कुँवर पेस्तोल खोस्ने प्रयासमा लागेपछि बैंकमा २ राउन्ड गोली फायर गरिएको थियो । १ राउन्ड गोली सुरक्षा गार्डको घाँटी पछाडि लागेको थियो भने अर्काे गोली आफ्नै साथीलाई लागेको थियो । लुटेरा समूहभित्रै आफ्नै साथीलाई गोली लागेपछि प्रहरीलाई पक्राउ गर्न सहज भएको थियो । गोलीबाट विजय सहनी घाइते भएका थिए ।

घाइतेको सहनीको तिघ्रामा गोली लागेको छ । घाइतेलाई लिएर भारततर्फ जाँदै गर्दा सीमावर्ती क्षेत्रबाट ३ जनालाई नियन्त्रणमा लिइएको मोरङ प्रहरीले जनाएको छ । भारतीय प्रहरीको सहयोगमा अन्यको खोज कार्यलाई तीव्र बनाइएको प्रहरीले जनाएको छ । घाइते गार्ड र लुटेरा समूहका सदस्यको विराटनगर र रंगेलीमा उपचार भइरहेको छ ।