राष्ट्रिय मानव अधिकार आयोगले रुपन्देही घटनाको निष्पक्ष छानबिन गरी दोषीलाई कानूनी कारबाही र घाइतेको निःशुल्क उपचार गर्न सरकारसँग आग्रह गरेको छ ।

रुपन्देहीस्थित प्रस्तावित मोतिपुर औद्योगिक क्षेत्रको जग्गामा अस्थायी टहरा बनाई बसेका व्यक्तिलाई सुरक्षाकर्मीले हटाउने क्रममा भएको झडपमा सुरक्षाकर्मीको गोली लागेर ४ जना प्रदर्शनकारीको मृत्यु र घाइते भएको घटनालाई लिएर आयोगले निष्पक्ष छानबिन गर्न माग गरेको हो ।

‘व्यक्तिको ज्यानै जाने गरी भएको घटनाको निष्पक्ष छानबिन गरी दोषीलाई कानूनबमोजिम कारबाहीको दायरामा ल्याउन, मृतकका परिवारलाई क्षतिपूर्ति उपलब्ध गराउनुपर्छ,’ आयोगका प्रवक्ता डा. टीकाराम पोखरेलले भने, ‘घाइतेको निःशुल्क उपचार गराउन तथा वास्तविक घरबारविहीनको पहिचान गरी यथोचित स्थानमा बसोबासको व्यवस्था मिलाउनुपर्छ ।’
     
आयोगले घटनाबाट उत्पन्न परिस्थितिबाट मानव अधिकारको प्रत्याभूति र शान्ति सुरक्षाको बहालीमा थप चुनौती हुन नदिनका लागि संयममता अपनाई विवादको समाधान वार्ताको माध्यमबाट गर्न सम्बद्ध सबै पक्षलाई अनुरोध समेत गरेको छ ।

आयोगका प्रवक्ता डा. पोखरेलका अनुसार घटनाको आयोगको लुम्बिनी प्रदेश कार्यालय बुटवलले अनुगमन शुरू गरेको छ । आयोगको टोलीले घटनाका सम्बन्धमा प्रारम्भिक अनुगमन गर्दा सुरक्षाकर्मीले प्रस्तावित औद्योगिक क्षेत्रको जग्गामा बनाइएका अस्थायी घरटहरा र प्रदर्शनकारीलाई हटाउने क्रममा प्रदर्शनकारी र सुरक्षाकर्मीबीच दोहोरो झडप भएको पाइएको छ ।

झडप हुँदा प्रदर्शनकारीतर्फ ४ जनाको मृत्यु भएको, सुरक्षाकर्मी र प्रदर्शनकारी दुवैतर्फ गरी ६० जना जति व्यक्तिहरू घाइते भएका, समाचार संकलनमा गएका पत्रकार समेत प्रदर्शनकारीको निसानामा परेका, गम्भीर घाइतेमध्ये २ जनालाई उपचारका लागि काठमाडौं पठाइएको तथा अन्यको स्थानीय अस्पतालमा उपचार भइरहेको जनाइएको छ ।

मृतकमध्ये १ जनाको मात्र सनाखत भएको र हाल घटनास्थलमा थप सुरक्षाकर्मीहरू परिचालन गरिएको पाइएको छ । यस घटनाबाट व्यक्तिको बाँच्न पाउने अधिकारको गम्भीर हनन हुन पुगेको आयोगले जनाएको छ ।