अफगानिस्तानको कान्दाहार शहरमा रहेको एउटा मस्जिदमा शुक्रवार भएको बम विस्फोटमा परी ज्यान जानेको संख्या ३२ पुगेको छ । 

सिया मुस्लिम समुदायका नागरिकको सो मस्जिदमा शुक्रवारको प्रार्थनाका बेलामा सो विस्फोट भएको थियो । शुक्रवार अपराह्न एकै पटक तीन वटा विस्फोट भएको थियो । 

विस्फोटमा परेर कम्तीमा ३२ जनाको ज्यान गएको छ भने अरू कम्तीमा पनि ६८ जना घाइते भएका छन् । उक्त मस्जिदका झ्यालका सिसाहरू फुटेको र शवहरू भुइँमा देखिएका तस्वीरहरु सञ्चारमाध्यमहरूले दिएका छन् । तीनजना हमलाकारीले आक्रमण गरेको प्रत्यक्षदर्शीहरूले एक स्थानीय पत्रकारलाई बताएका छन् । प्रत्यक्षदर्शीका अनुसार एकजना आक्रमणकारीले सो मस्जिदको प्रवेशद्वारमा विस्फोट गराएको हो । 

अरू दुई जना भने मस्जिदको भित्रै प्रवेश गरेर आक्रमण गरेका थिए । त्यस समयमा सो मस्जिदमा शुक्रवारको प्रार्थना भइरहेको थियो । 

शुक्रवारको साप्ताहिक प्रार्थना भएकाले मस्जिद पूरै भरिभराउ रहेको थियो । सोही मौका छोपेर यस्तो हमला गराइएको अनुमान गरिएको छ । 

तालिबानका सशस्त्र लडाकूहरूले पनि घटनास्थलमा सुरक्षा दिइरहेको बताएको छ । साथै यहाँका मस्जिदमा हिंसात्मक हमला हुने गरेकाले सुरक्षाकर्मीहरूले पनि मस्जिदमा सुरक्षा दिइरहेको बताइएको थियो । रासस-सिन्ह्वा