‘हिट ४९ प्रोफेसनल बक्सिङ च्याम्पियनसिप २०२१’को उपाधि बक्सर खेलाडी अविरल घिमिरेले चुमेका छन् । 

विश्वका युवा पुस्ताका चर्चित र अनुभवी बक्सरलाई मात्र रिङमा उतारिने अन्तर्राष्ट्रिय प्रतियोगितामा विजयी हुने उनी पहिलो नेपाली बक्सर हुन् ।

जापानको नायोगा शहरस्थित ‘नायोगा कंग्रेस सेन्टर इभेन्ट हल’मा आइतवार सम्पन्न ४९औं संस्करणको प्रतिस्पर्धामा अन्तर्राष्ट्रि«य बक्सर खेलाडी घिमिरेले जापानका व्यावसायिक किक बक्सर फुजीमुरालाई परास्त गरेका थिए ।

उनीहरू दुवै ‘के वान के बक्सिङ प्रतिस्पर्धा’मा भिडन्त गरिसकेका अनुभवी खेलाडी हुन् । 
    
‘हिमालयन चितुवा उपाधि’ले विश्व प्रसिद्ध अविरलले प्रतियोगिता चुमेसँगै सामाजिक सञ्जालमार्फत जीतका लागि आफ्ना पिता अन्तर्राष्ट्रिय बक्सिङ खेलाडी एवं प्रशिक्षक देवकुमार घिमिरे, आयोजक सिमुरा डोजोसहित नेपाली खेलप्रेमी सबैलाई धन्यवाद दिए ।

जापानको चर्चित सिमुरा डोजोले प्रतियोगिताको संयोजन गरेको थियो । अविरलले सोही डोजोमार्फत आफ्नो प्रतिभा प्रस्फूटन गर्दै आएका छन् । प्रशिक्षक देवका अनुसार नेपाली खेलाडी ‘हिट ४९ प्रोफेसनल बक्सिङ च्याम्पियनसिप २०२१’ प्रतियोगितमा छनौट हुुनु आफैंमा प्रतिष्ठाको विषय हो । उनका अनुसार खेलाडी अविरलले गत चैतमा जापानको टोकियो शहरमा सम्पन्न ‘के वान फेस्टिवल २०२१’ प्रतियोगिताको उपाधि चुम्ने कम उमेरका पहिलो नेपाली बक्सर बन्ने सौभाग्य प्राप्त गरेका थिए ।

उनले जापानी व्यवसायिक बक्सर खोतेचुलाई पहिलो राउन्डमा नै ढालेर नयाँ इतिहास कायम गरेका थिए । उनले गत वर्ष नै ‘प्रोफेसनल किक बक्सिङ हिट ४८’मा जापानी खेलाडी योसिदा यइजीमाथि सहज जीत हात पारेका थिए ।

यस्तो छ अबिरलको खेलयात्रा  

सानो उमेरमा बक्सिङमा ऐतिहासिक सफलता हात पार्दै आएका अविरलले प्रतिष्ठित ‘के वन किक बक्सिङ अन्तर्राष्ट्रिय प्रतियोगिता २०२०’मा दोस्रो स्थान प्राप्त गर्न सफल भएका थिए । नेपालको तर्फबाट कम उमेरमा प्रतियोगितामा भाग लिने पहिलो ‘बक्सर’ समेत भएका थिए । २१ वर्षीय उनले बाज्रिलियन खेलाडी फिलिपसँग प्रतियोगितामा प्राविधिक कारणले मात्र पराजित भएका थिए । 

चन्द्रागिरि नगरपालिका–१२ गुर्जुधारा निवासी उनीहरू विगत ५ वर्षदेखि जापानको नागोया शहरमा बस्दै आएका छन् ।

पछिल्लो समय उनले कम उमेरमा अन्तर्राष्ट्रिय किक बक्सिङ प्रतियोगितामा खेल्ने पहिलो नेपाली युवा बन्ने सौभाग्य समेत पाएका छन् । ‘हिट ४९ प्रोफेसनल हिट बक्सिङ च्याम्पियनसिप २०२१’लाई जापानसहित अन्तर्राष्ट्रिय खेल क्षेत्रले उच्च महत्त्वका साथ हेर्ने बताइएको छ । वेस्टर्न युनाइटेड क्लबका अध्यक्ष रामनारायण घिमिरेले दिएको जानकारीअनुसार अबिरलले खेलेका अधिकांश व्यावसायिक किक बक्सिङमा भिडन्तमा सर्वप्रथम भई विश्व कीर्तिमान कायम गर्न सफल भएका छन् ।

उनी गत वर्ष नै टोकियोको नागोयामा सम्पन्न हिट ४६ किक बक्सिङको टाइटल जित्न सफल भएका थिए । रोमाञ्जकारी भिडन्तमा उनले जापानी च्याम्पियन मुकेवासलाई पहिलो राउन्डमै मुक्का प्रहार गरी मैदानमा ढालेर टाइटल उपाधि जित्ने कान्छा बक्सर बनेका थिए ।

उनले हालसम्म हिट –२४ किक बक्सिङ खेलको मिडिल वेटको २ पटक च्याम्पियन तथा हालसम्म विभिन्न खेलमा अपराजित यात्रा गर्ने क्रममा ९ खेलमा नकआउट गर्दै विजय हासिल गरिसकेका र तीमध्ये ९ अन्तर्राष्ट्रिय खेलका ८ खेलमा सर्वप्रथम भई विश्व कीर्तिमान कायम गर्न सफल भएका गुर्जुराधास्थित अन्तर्राष्ट्रियस्तरको भेहिकल एकेडेमी एण्ड रिसर्च सेन्टरका अध्यक्ष राजेश घिमिरे जानकारी दिए ।

अविरलले नियमितरूपमा सिमुरा डोजोमा प्रशिक्षण लिँदै आएका उनले जानकारी दिए । ‘अविरलसँग अद्भूत, अदम्य साहस, जोश र लगनशीलता छ । ऊ राष्ट्रिय प्रतिभा हो । सम्मान गरौं,’ उनले भने ।