भारतसँगको सीमा नजिक चीनले नयाँ नयाँ गाउँ बनाउनु चिन्ताको विषय भएको भारतीय सेनाका लेफ्टिनेन्ट जनरल मनोज पाण्डेले बताएका छन् । 

पूर्वी कमान्डका जनरल अफिसर कमान्डिङ–इन–चीफ पाण्डेका अनुसार भारतीय सेनाले सीमावर्ती गाउँहरूको बारेमा संज्ञान लिएको छ । 

चीनले तिब्बतमा सीमा नजिक ६०० वटा गाउँहरू बनाएको छ । गाउँ बसाउनका लागि उसले पूर्वाधार समेत निर्माण गरेको छ । यो पूर्वाधार नागरिक र सैन्य दुवै प्रयोजनका लागि उपयोग गरिनेछ । 

भारतीय सेनाले पनि अरुणाचल प्रदेश सरकारसँग मिलेर सीमा नजिक नमूना गाउँ बनाउन खोजिरहेको छ । 

‘हामीले सीमावर्ती गाउँ बसाउने पहल गरेका छौं । त्यसक्रममा हामीले तीनदेखि चार गाउँको पहिचान गरेका छौं । तिनलाई हामी नमूना गाउँका रूपमा विकसित गर्नेछौं,’ पाण्डेले पत्रकार नितिन गोखलेलाई बताए । 

अरुणाचल सरकारले यस वर्षको बजेटमा तिब्बत सीमा नजिक तीनवटा नमूना गाउँ बनाउने घोषणा गरेको छ । यसका लागि बजेटमा ३० करोड भारु छुट्ट्याइएको छ । 

सन् २०१७ देखि चिनियाँ कम्युनिस्ट पार्टीले भारत र भुटान सीमा नजिक ६२८ वटा सीमारक्षक गाउँहरू बनाएको छ ।