अविरल वर्षाका कारण देशका १९ जिल्ला प्रभावित भएको गृह मन्त्रालयले जनाएको छ । मन्त्रालयले मंगलबार जारी गरेको विज्ञप्तिमा कालीकोट, डडेलधुरा, कञ्चनपुर, बझाङ, बर्दिया, कैलाली, डोटी, सुनसरी, दैलेख, दार्चुला, बाजुरा, सुर्खेतलगायतका १९ जिल्ला प्रभावित हुनुका साथै ६ जनाको मृत्यु भएको उल्लेख गरिएको छ ।

मृतकमा कालिकोटका १ जना, डडेलधुराका १, डोटीका २ र सुनसरीका २ जना रहेका छन् । यस्तै ५ जना घाइते भएका छन् भने बेपत्ताको विवरण मन्त्रालयले खुलाएको छैन । तर, मिडियो रिपोर्टमा बझाङमा पहिरोमा परी २३ जना बेपत्ता भएको उल्लेख गरिएको छ ।

यस्तै ३ दिनदेखिको अविरल वर्षाका कारण ४ घर पहिरोले पूर्णरुपमा क्षतिग्रस्त भएको छ भने करिब ५०० परिवारलाई सुरक्षित स्थानमा स्थानान्तरण गरिएको छ । कतिपय जिल्लाहरुमा सञ्चार सम्पर्क, विद्युत सेवाका साथै सडक अवरुद्ध भएको पनि मन्त्रालयका प्रवक्ता फणिन्द्रमणि पोखरेलले जारी गरेको विज्ञप्तिमा उल्लेख छ ।

यसैबीच बाढी पहिरोबाट सिर्जित परिस्थितिलाई दृष्टिगत गर्दै आजै गृहमन्त्री बालकृष्ण खाँणको अध्यक्षमा बैठक बसेर प्रभावित जिल्लाहरुमा नागरिकको जीउधनको सुरक्षाका लागि सुरक्षा निकायहरुले संयुक्त प्रयास जारी राख्न एवम् सेनाको हेलिकोप्टरलाई तयारी अवस्था राख्नका साथै उद्दारका लागि अन्य आवश्यक सामग्रीहरु समयमै उपलब्ध गराउन सकिने गरी व्यवस्थापन गर्न निर्देशन भएको मन्त्रालयले जनाएको छ ।
मन्त्रालयले वर्षा कायमै रहेको र अझै केही दिन जारी रहने जल तथा मौसम विभागलाई उदृत गर्दै जनाएको छ । मन्त्रालयले तटीय र जोखिमयुक्त स्थानमा रहेका नागरिकलाई उच्च सतर्कता कायम राख्न पनि अनुरोध गरेको छ ।