कृष्णसागरमाथि आइपुगेका अमेरिकाका दुई लडाकू विमानलाई रुसी विमानहरूले मंगलवार लखेटेका छन् ।

रुसको सीमा नजिक आइपुगेका ती विमानलाई धपाउनका लागि त्यहाँको वायुसेनाले सुखोइ सु–३० विमान पठाएको थियो ।

क्रेमलिनको रक्षा मन्त्रालयले जारी गरेको भिडियो फूटेजमा अमेरिकाका दुईवटा बमवर्षक विमान र दुईवटा केसी–१३५ ट्यांकर विमानले आकाशमै इन्धन हालिरहेका थिए । 

अमेरिकी विमानहरूलाई सीमामा आइपुग्नुअघि नै आफ्ना विमानले हटाएको अनि बेसमा सुरक्षित फर्केको रुसको भनाइ छ । 

कृष्णसागरको ठ्याक्कै कुन ठाउँमा यो आमनेसामने भएको हो भन्ने स्पष्ट छैन । रुसको सीमा उक्त सागरसँग जोडिन्छ तर उसले क्राइमियालाई पनि आफ्नै भूभाग मान्छ । 

अमेरिका लगायत पश्चिमी मुलुकहरू क्राइमियालाई युक्रेनको भूभाग मान्छन् । यसले गर्दा भूराजनीतिक तनावको स्थिति छ । 

सोमवार रुसका राष्ट्रपति भ्लादिमिर पुटिनले क्राइमिया नजिक युद्धाभ्यास शुरू गरेका छन् । समुद्र किनारमा अवतरण गर्ने र जेट विमानबाट बम हान्ने अभ्यास गरिएको छ ।