बाढीपहिरोले पुर्‍याएको क्षतिको अवस्थाबारे जानकारी लिन प्रधानमन्त्री शेरबहादुर देउवाले बैतडीको स्थलगत निरीक्षण गरेका छन् ।

प्रधानमन्त्री देउवाले बिहीवार सिगास गाउँपालिका–५ को ढुंगाड क्षेत्रमा बाढीपहिरोले पुर्‍याएको क्षतिबारे स्थलगत निरीक्षण गरेका बैतडीका निमित्त प्रमुख जिल्ला अधिकारी खगेन्द्र भारतीले जानकारी दिए ।

उनले बाढीपहिरोबाट मृत्यु भएका र प्रभावित भएका परिवारलाई सरकारले राहत दिने बताए ।

ढुंगाड क्षेत्रमा सेती नदीले ५ घर बगाउनुका साथै १५० बिघा खेती गरेको जमिन बगरमा परिणत गरेको थियो । जिल्लाको शिवनाथ गाउँपालिका र सुर्नया गाउँपालिकामा पहिरामा परी ४ जनाको ज्यान गएको थियो । बैतडीका १ दर्जन बढी घरमा पहिरोले क्षति पुर्‍याएपछि उनीहरू विस्थापित भएका छन् ।

प्रधानमन्त्री देउवासँग अर्थमन्त्री जनार्दन शर्मा, संस्कृति, पर्यटन तथा नागरिक उड्डयनमन्त्री प्रेमबहादुर आले, नेपाली कांग्रेसका केन्द्रीय सदस्यहरू एनपी साउँद, रमेश लेखक र वीरबहादुर बलायर पनि रहेका छन् ।

प्रधानमन्त्री देउवा बैतडीपछि डडेल्धुरा जिल्लाको निरीक्षण गर्न नेपाली सेनाको हेलिकप्टरमार्फत त्यसतर्फ प्रस्थान गरेका छन् ।