नेकपा एमालेको स्थायी कमिटी बैठक शुरू भएको छ । ललितपुरको च्यासलस्थित तुलसीलाल स्मृति प्रतिष्ठानमा शुरू भएको बैठकका पाँचवटा प्रस्ताव छन । 

असोज १५–१७ मा सम्पन्न विधान महाधिवेशनको समीक्षा, कात्तिक ६ गते हुने वडा अधिवेशन, कात्तिक ९ गतेका लागि तय भएको पालिका अधिवेशन तथा मंसिरमा हुने राष्ट्रिय महाधिवेशनको विषय बैठकका एजेण्डा छन् ।

यस्तै हालै भएको अविरल वर्षाका कारण भएको धनजनको क्षतिलगायत समसामयिक विषयमा समेत छलफल हुने बताइएको छ ।

त्यसैगरी, संसदमा जारी अवरोधको विषयमा पनि बैठकमा छलफल हुनेछ । 

माधव नेपाललगायत १४ सांसदलाई पदमुक्त गर्न गरिएको सिफारिश सभामुख अग्नि सापकोटाले कार्यान्वयन नगरेको भन्दै एमालेले भदौ २३ गतेदेखि संसद्मा अवरोध गर्दै आएको छ ।

एमाले स्थायी कमिटी बैठकमा १० बुँदे सहमति कार्यान्वयनको विषयमा पनि असन्तुष्ट नेताहरूले कुरा उठाउने बताएका छन् । 

एमाले अध्यक्ष ओलीले बागमती प्रदेश कमिटी बैठकमा दश बुँदे सहमतिको औचित्य सकिएको टिप्पणी गरेका थिए ।

त्यसबाट दश बुँदे सहमति तयार गर्न खटिएका नेताहरू ओलीको टिप्पणीप्रति आक्रामक देखिएका छन् । त्यसमध्येका नेताहरू भीम रावल र घनश्याम भुसालले सार्वजनिक रूपमा नै ओलीको टिप्पणीको विरोध गरेका छन् ।