लमजुङ जिल्लाकै ठूलो राशि भएको २९औं त्रिवेणी कप प्रतियोगिता बेंसीशहरमा आगामी पुस १२ गतेदेखि सञ्चालन हुने भएको छ ।

बेंसीशहर नगरपालिका–७ स्थित सहजी खेलमैदानमा त्रिवेणी युवा क्लबको आयोजनामा २९औं त्रिवेणी कप राष्ट्रव्यापी फूटबल प्रतियोगिता सञ्चालन हुने भएको हो ।

आयोजक क्लबले शनिवार पत्रकार सम्मेलन गरी प्रतियोगिताबारे जानकारी गराएको हो । बर्सेनि प्रतियोगिता हुँदै आए पनि गत वर्ष कोरोना संक्रमणका कारण स्थगित गरिएको र यस वर्ष जोखिम कम भएकाले प्रतियोगितालाई निरन्तरता दिन लागिएको क्लबका अध्यक्ष विनोद गुरुङले बताए । उनले भने, ‘खेलाडीहरूको प्रतिभा तिखार्दै राष्ट्रिय खेलाडी उत्पादन गर्नेदेखि जिल्ला र देशलाई चिनाउन यस प्रतियोगिताले सहयोग गर्नेछ ।’

फूटबल खेललाई व्यावसायिक बनाउने, प्रतिभाशाली खेलाडीको पहिचान गराउने र  स्थानीय खेलाडीलाई राष्ट्रियस्तरका खेलाडीसँग खेलको अनुभव बटुल्न अवसर दिने भएकाले प्रतियोगिता आयोजना गर्न लागेको बताइएको छ । यस्ता प्रतियोगिताबाट बर्सेनि राम्रा राम्रा खेलाडी उत्पादन हुँदै आएका र यस वर्ष समेत राम्रो फुटबल खेलाडी उत्पादन हुने अपेक्षा आयोजकको छ । 

प्रतियोगितामा लमजुङसहित काठमाडौं, पोखरा, चितवन, मनाङ, गोरखा, तनहुँलगायत ठाउँबाट करीब २५ टोलीको सहभागिता हुने अपेक्षा गरिएको छ । 

प्रथम हुने टोलीलाई ५ लाख रुपैयाँ, पदक, ट्रफी र प्रमाणपत्र र दोस्रोलाई ३ लाख रुपैयाँसहित अन्य पुरस्कार दिइने क्लबका अध्यक्ष गुरुङले बताए । सेमिफाइनमा पुग्ने २ टोलीलाई ५०/५० हजार रुपैयाँ र प्रमाणपत्र, सर्वाधिक गोलकर्ता र सर्वोत्कृष्ट खेलाडीलाई जनही १५/१५ हजार रुपैयाँ प्रदान गरिने भएको छ ।

प्रतियोगिताको क्वार्टर फाइनलभन्दा माथिमा खेलहरूमा ‘म्याच अफ दी म्याच’ घोषणा गरेर ट्रफी र प्रमाणपत्र वितरण गरिने भएको छ । प्रतियोगितामा करीब २५ टोलीको सहभागी हुने अपेक्षा भए तापनि राम्रो टोली छनोट गरेर १६ टोलीलाई  मात्र खेलाउने कि वा सहभागी सबै टोलीलाई खेलाउने भन्ने विषयमा टुंगो लगाउन भने बाँकी रहेको अध्यक्ष गुरुङले बताए ।

उनका अनुसार प्रतियोगितामा दैनिक ५ हजार दर्शकको उपस्थिति हुने अपेक्षा गरिएको छ । करीब १० दिनसम्म हुने प्रतियोगिता अवधिभर ५० हजार दर्शकको उपस्थित हुने अनुमान आयोजकको छ । दर्शकमध्ये दैनिक ८०० जनालाई प्याराफिट सिटमा बस्न सक्ने र उनीहरूलाई प्रतिव्यक्ति रु ५० टिकटको  व्यवस्था गरिने भएको छ ।