१ नम्बर प्रदेशका सभामुख प्रदीपकुमार भण्डारीसँग प्रदेश सरकार रुष्ट बनेको छ ।

मुख्यमन्त्री राजेन्द्र राईले विश्वासको मत लिने भनिएको बैठक सभामुख भण्डारीले सारेपछि सरकार सभामुखसँग रुष्ट बनेको हो ।

पेट्रोलियम पदार्थको मूल्यवृद्धिको विरोध गर्दै नेत्रविक्रम चन्द ‘विप्लव’ नेतृत्वको नेपाल कम्युनिस्ट पार्टीले आह्वान गरेको नेपाल बन्दको प्रभावलाई देखाउँदै सांसद आउन नसक्ने भनी नेकपा एमालेका सांसदले मंगलवारको बैठक स्थगित गर्न माग गरेका थिए ।

एमालेले बैठक स्थगित गर्न सभामुख भण्डारीलाई लिखित पत्र नै दिएको थियो । पत्र पाएपछि भण्डारीले कार्यव्यवस्था परामर्श समितिको बैठक बोलाएका थिए ।

बैठक सार्ने विषयमा सत्ता साझेदार दल र प्रमुख प्रतिपक्षी दलबीच रस्साकस्सी चलेको थियो । सत्ता साझेदार दलहरूले बैठक शुरू गर्नुपर्ने अडान राखेपछि प्रमुख प्रतिपक्षी एमालेका प्रमुख सचेतक बुद्धिकुमार राज भण्डारी बैठक नसकी बैठकस्थलबाट बाहिरिएका थिए ।

सत्ता साझेदार दलहरूले बैठक बोलाउनुपर्ने अडान राखेपछि सभामुख भण्डारीले बैठक बोलाएका थिए ।

प्रतिपक्षी दलका सांसद उपस्थित नभएपछि विश्वासको मत लिने प्रस्ताव टेबुल गरेर भोलि बुधवारसम्मका लागि बैठक स्थगित गरिएको छ  । सभामुख भण्डारीको भूमिका सन्तुलित नदेखिएको मुख्यमन्त्री राईले आरोप लगाए । राईले सभामुखको व्यवहार प्रमुख प्रतिपक्षी दलको जस्तो भएको बताए ।

प्रमुख प्रतिपक्षी दलले भने सरकारले सत्ताको दुरुपयोग गरेको ओरोप लगाएको छ । गठबन्धनका सांसदलाई सरकारी गाडीको प्रयोग गरेर बन्दमा ल्याइएको आरोप छ । एमालेका प्रमुख सचेतक बुद्धिकुमार राज भण्डारीले भने, ‘अहिलेको परमादेश सरकारले पेट्रोलियम पदार्थको मूल्य नबढाएको भए हामीले बैठक रोक्न माग गर्नुपर्ने आवश्यक नै थिएन ।’

बैठक बुधवार बिहान ११ः३० बजे बस्ने गरी स्थगित गरिएको छ ।