गृहमन्त्री बालकृष्ण खाँणको गृहजिल्ला रूपन्देहीमा उनी निकट अधिकांश उम्मेदवार पराजित भएका छन् । शुक्रवार भएको प्रदेश सभा क्षेत्रीय अधिवेशनमा सभापति देउवा (खाँण) निकट उम्मेदवारहरूले हार बेहोरेका हुन् । 

रूपन्देहीमा १० वटा प्रदेश सभा निर्वाचनमा संस्थापन इतर (रामचन्द्र पौडेल) समूहका ७ र खाँण निकट ३ जना सभापति विजयी भएका छन् । पौडेल समूहले प्यानलसहित जित हासिल गरेको छ । यसले गृहमन्त्री खाँण आफ्नै गृहजिल्लामा धेरै कमजोर रहेको पुष्टि गर्छ । रुपन्देहीमा प्रतिनिधि सभामा ५ वटा निर्वाचन क्षेत्र छन् । 

देउवा समूहबाट प्रदेश सभा निर्वाचन क्षेत्र नम्बर १ (क) बाट नवीनराज आचार्यको समूह र (ख) बाट मदनप्रसाद पोखरेलको प्यानल विजयी भएको छ । उनीहरू दुवै जना खाँण निकट हुन् । 

खाँणको गृहनगर प्रदेश सभा निर्वाचन क्षेत्र ३ (क) मा मतगणना स्थलमा आक्रमण भएपछि मतगणना स्थगित भएको छ । त्यहाँ पनि पौडेल समूहका उम्मेदवार जित नजिक छन् । ३ (ख) बाट भने देउवा समूहका घनश्याम चालिसेको समूह विजयी भएको छ । 

क्षेत्र नम्बर २ को (क) निर्वाचन क्षेत्रबाट खडक बहादुर महत नेतृत्वको पौडेल समूह विजयी भएको छ । उनी पौडेल समूहका हुन् । त्यस्तै (ख) बाट पौडेल समूहकै परशुराम ढकाल नेतृत्वको प्यानल निर्वाचित भएको छ । २ को (क) बाट खाँणका स्वकीय सचिव विजेश न्यौपाने पनि पराजित भए । 

यता प्रदेश सभा निर्वाचन क्षेत्र नम्बर ४ (क) मा शिवकुमार यादव र ४ (ख) मा श्रीराम यादव नेतृत्वको प्यानलै निर्वाचित भएको छ । उनीहरु पनि पौडेल निकट नेताहरू हुन् । निर्वाचन क्षेत्र नम्बर ५ मा (क) र (ख) दुवै निर्वाचन क्षेत्रमा भरतकुमार शाह पक्षका उम्मेदवारहरू विजयी भएका छन् । उक्त निर्वाचन क्षेत्रको प्रदेश सभा निर्वाचन क्षेत्र नम्बर (क) बाट रामबहादुर थापाको समूह विजयी भएको छ ।  (ख) बाट यसअघि नै शाहनिकट समूह निर्विरोध निर्वाचित भएको छ ।