आगामी शुक्रवारदेखि शुरू हुने नेकपा एमालेको १० औं राष्ट्रिय महाधिवेशनमा पदाधिकारीका लागि झन्डै १ दर्जन नेताले आकांक्षी देखाएका छन् ।

औपचारिक रूपमा कसैले उम्मेदवारी घोषणा नगरे पनि सामाजिक सञ्जाल तथा विभिन्न प्लेटफर्ममार्फत नेताहरूले आफ्नो दाबी पेश गरिरहेका छन् । प्रदेश १ बाट १० जना नेता पदाधिकारीको आकांक्षी छन् ।

प्रदेश १ बाट प्रतिनिधित्व गर्ने सुवास नेम्वाङ वरिष्ठ उपाध्यक्षको आकांक्षी छन् । तर उनले आफ्नो उम्मेदवारी भने घोषणा गरिसकेका छैनन् ।

केही दिनअघि विराटनगरमा प्रेस चौतारीले गरेको पत्रकार सम्मेलनमा उनले पार्टीभित्र छलफल गरेर मात्रै उम्मेदवारी दिने बताएका थिए ।

‘अध्यक्षमा केपी ओलीपछिको वरीयतामा संसदीय दलको उपनेता रहेकाले स्वाभाविक रूपले उहाँले पदाधिकारीमा दाबी गर्नुहुन्छ,’ नेम्वाङ निकट एक नेताले भने । संविधान सभाका पूर्वअध्यक्ष समेत रहेका नेम्वाङ अहिले प्रतिनिधि सभामा एमाले संसदीय दलको उपनेता छन् । 

पूर्वमन्त्री लालबाबु पण्डितले पनि उपाध्यक्षमा उम्मेदवारी दिने बताएका छन् । अघिल्लो महाधिवेशनमा माधव नेपाल समूहबाट उपाध्यक्षमा भिडेको उनी पराजित भएका थिए ।

प्रतिनिधि छनोट गर्दा पनि सहमतिमै भएकाले सहमति भए पदाधिकारीको अन्य पद पनि स्वीकार्न सकिने उनको भनाइ छ । पदाधिकारीलाई समावेशी बनाउनका लागि पनि आफू उपाध्यक्ष निर्वाचित हुनुपर्ने उनको दाबी छ ।

अहिले एमालेको सचिव रहेका योगेश भट्टराई र भीम आचार्यले पनि पदाधिकारीमा दाबी गरेका छन् । दुवैको दाबी उपमहासचिवमा भएपनि सहमति भएको खण्डमा सचिवमा चित्त बुझाउने निकटस्थहरू बताउँछन् । 

१० बुँदेमार्फत एमालेमै बसेका उनीहरू महाधिवेशनको मुखमा अध्यक्ष केपी शर्मा ओललाई फकाइरहेका छन् । प्रचार विभाग प्रमुख समेत रहेका भट्टराईले खुलेर नै ओलीको प्रशंसा गरिरहेको एमालेकै नेताहरू बताउँछन् । 

पार्टीको सचिवका लागि पूर्वका केही नयाँ अनुहार दाबेदार देखिएका छन् । 

पूर्वमुख्यमन्त्री शेरधन राई, अखिलका पूर्वअध्यक्ष हिक्मत कार्की, गुरु बराल, राजेन्द्र गौतम, पूर्वमन्त्री भानुभक्त ढकाल, परशुराम मेघी गुरुङले पनि सचिव दाबी गरिरहेका छन् । 

राष्ट्रिय सभाको एक समितिका सभापति समेत रहेका गुरुङ माधव नेपालको क्याम्प छाडेर संस्थापन पक्षमै बसेका थिए । 

गुरु बराल ५ औँ  महाधिवेशनपछि लगातार केन्द्रीय कमिटीमा रहँदै आएका छन् । एमाले अध्यक्ष ओलीका समकालीन नेताका रूपमा बराललाई लिने गरिन्छ । लम्बेतान भाषण र व्यवहारका कारण नै उनी राजनीतिमा पछाडि परेको निकटस्थहरू बताउँछन् ।

‘एक दुईजना कार्यकर्ता मात्रै भए पनि दुई घण्टा बढी भाषण गर्ने गर्ने उहाँको बानी छ । समकालीनहरू पार्टीको नेतृत्वमा पुग्दा उहाँले केन्द्रीय सदस्यमै चित्त बुझाउनुभएको छ,’ पूर्वका एक नेताले लोकान्तरसँग भने । 

हिक्मत कार्की प्रदेश १ प्रदेश सभामा एमालेको उपस्थिति सशक्त बनाउने भूमिकामा देखिएका छन् । एमाले बाहेकका अन्य दलसँग पनि राम्रो सम्बन्ध बनाएका कार्कीलाई एमालेभित्रको चाणक्य भनेर समेत अन्य दलले चिन्ने गरेका छन् । भीम आचार्य मुख्यमन्त्री भएपछि विपक्षी गठबन्धनको सांसद चोर्न सबैभन्दा बढी कार्की नै सक्रिय भएका थिए । संसद्मा पनि उनै सक्रिय देखिन्थे । 

सचिवमा दाबी गरेका शेरधन राई विगतमा राष्ट्रपति विद्यादेवी भण्डारी निकट मानिन्थे । भण्डारीको माइती भोजपुर भएकाले राईले दिदी भनेर सम्बोधन गर्ने गरेका छन् । उनलाई राष्ट्रपति भण्डारीको सहानुभूति रहने अनुमान गरिएको छ ।

गत प्रतिनिधि सभा निर्वाचनमा मोरङबाट प्रत्यक्ष निर्वाचित भानुभक्त ढकालले ओली प्रधानमन्त्री भएको समयमा लामो समय मन्त्री हुने अवसर पाएका थिए । कोरोना महामारीको समयमा भएको स्वास्थ्य सामग्री खरिद प्रक्रियामा उनी विवादमा तानिएका थिए । 

अन्य केही नेताहरूले पनि पदाधिकारीमा आकांक्षा राखेको भएपनि घोषणा गर्न सकेका छैनन् । ‘अध्यक्ष ओलीसँग डराएर नेताहरू बोल्न सकेका छैनन् । उनीहरूले मुख नखोले पनि आफू निकटका कार्यकर्तालाई प्रचार गर्न भने लगाइरहेका छन्,’ एक नेताले भने ।