हालसालै मात्र नेकपा एमाले प्रवेश गरेका मेडिकल व्यवसायी दुर्गा प्रसाईं एमाले महाधिवेशनमा सेलिब्रेटी बनेका छन् । 

महाधिवेशन उद्घाटनको दिनदेखि नै चितवनमा रहेका प्रसाईंले बन्दशत्र स्थलमा गतिविधि गरिरहेका छन् । 

महाधिवेशन प्रतिनिधिसँग कुराकानी गरिरहेका प्रसाईंले सहमतिमा नेतृत्व चयन गर्नुपर्ने लबिङ गरिरहेका छन् । महाधिवेशनको बन्दशत्र स्थलमा प्रसाईंसँग फोटो र सेल्फी खिच्न कार्यकर्ताको घुइँचो लागेको छ ।

झापाबाट महाधिवेशन प्रतिनिधि चयन भएका प्रसाईं माओवादी केन्द्रका अध्यक्ष पुष्पकमल दाहाल प्रचण्डविरुद्ध खरो अभिव्यक्ति दिएर चर्चामा रहन्छन् । 

हालसालै उनले आगामी चुनावमा प्रचण्डलाई पराजित गराउने दाबीसहित उनले जितेमा आफू जीवनभर उनको चालक बन्न तयार रहेको टिप्पणी गरेका थिए । 

झापामा बीएण्डसी मेडिकल कलेज सञ्चालन गर्दै आएका प्रसाईं कात्तिक ७ गते एमाले प्रवेश गरेका थिए । पार्टी प्रवेश गर्नुअघि उनी असोज १५ गतेदेखि भएको विधान महाधिवेशनमा सहभागी भएका थिए । माओवादी केन्द्रको कुनै कमिटीमा सदस्य नरहे पनि उनले माओवादी परित्याग गर्दै एमाले प्रवेश गरेको बताउँदै आएका छन् । 

एमाले अध्यक्ष केपी शर्मा ओली र माओवादी केन्द्रका अध्यक्ष पुष्पकमल दाहाल प्रचण्डलाई आफ्नो घरमा लगेर जुम्लाको मार्सी चामलको भात खुवाएपछि प्रसाईंलाई ‘मार्सी’ उपनामले धेरैले चिन्ने गरेका छन् । 

चिकित्सा शिक्षा सुधारको माग गर्दै आन्दोलन गर्ने डा. गोविन्द केसीले प्रसाईंलाई मेडिकल माफियाको संज्ञा दिने गरेका छन् । व्यवसायी प्रसाईंले आफूलाई लागेको आरोपको विम्बलाई व्यवसायमा ढाल्ने तयारी गरेका छन् । 

प्रसाईंले मार्सी बियर र माफिया ह्वीस्की ल्याउने घोषणा गरिसकेका छन् ।