भारतको उत्तरप्रदेशमा एकै दलित परिवारका चार जनाको हत्या भए पछि त्यहाँको प्रदेश सरकार माथि प्रश्न उठ्न थालेको छ।

योगी आदित्यनाथले नेतृत्व गरेको उत्तर प्रदेशको प्रयागराजमा एकै परिवारका चार सदस्यको हत्या भए पछि त्यहाँ राजनीतिक दलहरूले योगी सरकार माथि प्रश्न उठाएका छन्। कांग्रेस महासचिव प्रियंका गान्धी देखि समाजवादी पार्टी प्रमुख अखिलेश यादवसम्मले उक्त घटनाको कडा निन्दा गरेका छन्।

पिडित परिवारलाई भेट्दै गान्धीले योगी सरकारको कानून व्यवस्था माथि प्रश्न उठाएका छन्। त्यसै गरी पूर्व मुख्यमन्त्री अखिलेश यादवले ट्विट गरेर दलित विरोधी भाजपा सरकारमाथि एउटा बदनाम दाग लागेको टिप्पणी गरेका छन्। 'आशा गरेका छौं की उक्त हत्या काण्डका अपराधी विना चश्मा पनि देख्न सकियोस्।'

त्यसै गरी बहुजन सम्जावादी पार्टीकी प्रमुख तथा पूर्व मुख्यमन्त्री मायावतीले पनि योगी सरकारमाथि प्रश्न उठाएका छन्।'उत्तर परदेशको प्रयागराजमा हालै अपराधीले एउटा दलित परिवारको चार जनाको हत्या गरेको छ, त्यो अत्यन्त दुखद् तथा शर्मनाक हो,' मायावतीले थप लेखेकी छन्,'यो घटना सरकारको लाचार कानून व्यवस्थालाई उजागर गर्छ, यस्तो लाग्छ की भाजपा पनि अब सपा सरकारको नक्साकदममा नै हिडिरहेको छ।'

गएको बुधबार राती प्रयागराजको फाफामउ गाउँमा दलित परिवारका चार जना सदस्यहरूलाई धारिलो हथियार प्रयोग गरेर सामुहिक रूपमा हत्या गरिएको थियो।५० वर्षीय फूलचन्द पासी, उनको ४५ वर्षीया श्रीमती, १० वर्षीय छोरा र १७ वर्षीया छोरीको हत्या भएको थियो।