नेकपा एमालेको महासचिवका लागि केपी शर्मा ओलीले विष्णु पौडेललाई अगाडि सार्ने तयारी गरेका छन् । 

आफूपक्षीय नेताहरूसँगको कुराकानी र महाधिवेशन प्रतिनिधिसँगको भावना बुझेपछि ओलीले पौडेललाई अगाडि सार्ने तयारी गरेको एमाले उच्च स्रोतले बताएको छ । 

महासचिवका लागि शंकर पोखरेलले पनि आकांक्षा राखेका थिए । अहिले पदाधिकारीमा नभएका पोखरेललाई एकैपटक महासचिव बनाउनुभन्दा एक कार्यकाल उपमहासचिव बनाएर अर्को पटक महासचिव बनाउन उपयुक्त हुने बहुसंख्यक महाधिवेशन प्रतिनिधिले सुझाव दिएको स्रोतले बतायो । 

एमाले दशौं महाधिवेशनको बन्दसत्रले शनिवार पदाधिकारी र केन्द्रीय कमिटीमा सर्वसम्मत नेतृत्वको लागि नाम प्रस्ताव गर्ने अधिकार केपी ओलीलाई दिएको थियो । पदाधिकारीको सूची बनाउन ओलीले बिहानैदेखि नेताहरूसँग परामर्श गरेका थिए । 

अधिकांशले पौडेललाई महासचिव बनाउन सुझाव दिएका थिए । असार २७ गते १० बुँदे सहमति गरेका नेताहरूले पनि पौडेललाई बनाउन उपयुक्त हुने राय दिएका छन् । 

ओलीले वरिष्ठ उपाध्यक्षमा ईश्वर पोखरेलको नाम प्रस्ताव गर्ने तयारी गरेका छन् । वरिष्ठ उपाध्यक्षमा सुवास नेम्वाङले पनि दाबी गरेका थिए । ओलीले पदाधिकारीको सूची बनाउन नसक्दा बिहान १० बजे शुरू हुने भनिएको बन्दसत्र अझै शुरू हुन सकेको छैन । 

शुक्रवार शुरू महाधिवेशन नयाँ नेतृत्व चयन गर्दै आइतवार समापन गर्ने एमालेको तयारी छ ।