ममता बनर्जी नेतृत्वको तृणमूल कांग्रेसले सोमवार विपक्षी दलहरूको संयुक्त बैठकमा भाग नलिने भएको छ । 

संसद्को सत्रका दौरान संयुक्त रणनीति बनाउनका लागि कांग्रेसले बोलाएको बैठकमा तृणमूल नआउने भएको हो । 

त्रिपुरा, मेघालय र गोवा राज्यमा तृणमूलले कांग्रेसका विधायकहरूलाई आफ्नो पक्षमा पारिरहेको बेलामा बैठक बहिष्कारको घोषणा भएको हो । तृणमूलले आफूलाई भारतीय जनता पार्टीको प्रमुख विपक्षका रूपमा उभ्याउन खोजिरहेको छ । 

‘हालैका विधानसभा निर्वाचनहरूमा पाएको प्रचण्ड विजयपछि तृणमूल नै भाजपाको प्रमुख विपक्षी भएको स्पष्ट भएको छ । भाजपाले बंगालमा आक्रामक चुनाव प्रचार गरेको भए पनि हामीले उसलाई धूलो चटायौं,’ एक वरिष्ठ नेताले बताए । 

‘हामी राष्ट्रिय राजनीतिमा आफ्नो प्रभाव विस्तार गर्न व्यस्त छौं । हामी भाजपाविरोधी राजनीतिक दलका रूपमा छवि बनाउन बनाउन चाहन्छौं । तर कांग्रेसले आफूलाई भाजपाविरोधी बलहरूको प्रमुख अनुहारका रूपमा प्रस्तुत गर्न खोजिरहेको छ र बैठक बोलाएको छ । हामी त्यसमा सहमत छैनौं,’ उनले थपे । 

अक्टोबर महिनामा ममता बनर्जीले भाजपाविरुद्धको लडाइँमा कांग्रेस लज्जास्पद रूपमा पराजित भएको बताएकी थिइन् । त्यसैले मानिसहरूले फासीवादी भाजपालाई हटाएर नयाँ भारत निर्माण गर्ने जिम्मेवारी तृणमूल कांग्रेसलाई दिएको उनको भनाइ छ ।