रुसले युके्रनविरुद्ध सन् २०२२ को आरम्भतिर सैन्य आक्रमण गर्नलाई योजना बनाएको शुक्रवार प्रकाशित एक प्रतिवेदनले जारी गरेको छ । 

द वाशिङटन पोस्टले प्राप्त गरेको एक गुप्तचरी दस्तावेजमा युक्रेन सीमामा रुसले सैनिक र सरसामान तैनाथ गरेको देखिन्छ । त्यहाँ रुसका कुल ७० हजार सैनिक रहेको बताइएको छ । 

सन् २०१४ मा क्राइमिया नजिक रुस र युक्रेनको सीमामा यसैगरी रुसी सैनिकहरू तैनाथ गरिएका थिए । त्यसपछि रुसले रणनीतिक रूपमा महत्त्वपूर्ण क्राइमिया कब्जामा लिएको थियो । 

युक्रेनले रुसका ९४ हजार सैनिक सीमा नजिक तैनाथ गरिएको अनुमान गरेको भने अमेरिकाले ७० हजार जति हुन सक्ने आकलन गरेको छ । 

तर त्यो संख्या बढेर एक लाख ७५ हजारसम्म पुग्न सक्ने अमेरिकाको अनुमान छ । 

मंगलवार अमेरिकाका राष्ट्रपति जो बाइडन र रुसका राष्ट्रपति भ्लादिमिर पुटिनबीच शिखरवार्ता हुन लागेको छ । त्यसले युक्रेन संकटको समाधान खोज्ने अपेक्षा छ ।