नेपाली कांग्रेसको प्रदेश अधिवेशनमा पार्टी सभापति शेरबहादुर देउवा पक्षले दुईवटा प्रदेशमा जीत हात पारेको छ । संस्थापन इतर पक्ष भने एउटा प्रदेशमा विजयी भएको छ ।

संस्थापन पक्षले कर्णाली र सुदूरपश्चिम प्रदेशमा सभापति जितेको हो । कर्णालीमा ललितजंग शाही र सुदूरपश्चिममा वीरबहादुर बलायर विजयी भएका हुन् । 

गण्डकी प्रदेशमा संस्थापन इतरका उम्मेदवार शुक्रराज शर्मा विजयी भएका छन् । लुम्बिनी प्रदेशमा मतगणना चलिरहेको छ ।

प्रारम्भिक मतगणनामा संस्थापनइतर समूहका अमरसिंह पुनले अग्रता कायम गरेका छन् भने संस्थापन पक्षका भरत साहले पच्छ्याइरहेका छन् । 

प्रदेश १ मा आइतवार दिउँसो मतगणना शुरू भएको छ । बागमती प्रदेशमा भने पुनः मतदान भइरहेको छ ।

पहिलो चरणमा कुनै उम्मेदवारले स्पष्ट बहुमत ल्याउन नसकेपछि धेरै मत ल्याएका इन्द्र बानियाँ र जगदीश्वर नरसिंह केसीबीच पुनः प्रतिस्पर्धा भइरहेको हो ।

प्रदेश २ मा भने निर्वाचन कार्यक्रम शुरू भएको छैन ।

प्रदेश २ मा संस्थापन पक्षबाट कृष्णप्रसाद यादव र विमलेन्द्र निधिको तर्फबाट रामसरोज यादवले दावी गरेका छन् ।