पहिलो चरणको निर्वाचनमा कसैले पनि स्पष्ट बहुमत ल्याउन नसकेपछि नेपाली कांग्रेसको बागमती प्रदेश सभापतिका लागि आइतवार दोस्रो चरणको निर्वाचन भएको छ । 

संस्थापन पक्षका इन्द्र बानियाँ र संस्थापनइतर समूहका जगदिश्वरनसिंह केसीबीच प्रतिस्पर्धा भएको हो । पहिलो चरणको मतदानमा तेस्रो स्थानमा पुगेका भीमसेनदास प्रधानले बानियाँलाई समर्थन गरेका छन् । 

शनिवार भएको मतदानमा संस्थापन पक्षका बानियाँले धेरै मत प्राप्त गरेपनि सभापतिका लागि आवस्यक ५१ प्रतिशत भोट नल्याएकाले आइतवार पुनः मतदान भएको हो । 

मतदान सम्पन्न भएको र आइतवार साँझदेखि नै मतगणना शुरू हुने निर्वाचन समितिका एक सदस्यले जानकारी दिए । राति अबेरसम्म नतिजा आइसक्ने उनले बताए । 

शनिवारको मतदानमा बागमती प्रदेश सभामा कांग्रेस संसदीय दलका नेता समेत रहेका बानियाँले ९ सय ९२  मत प्राप्त गरेका थिए । 

संस्थापन इतर रामचन्द्र पौडेल पक्षका केसीले ८ सय ७२ मत प्राप्त गरे । कृष्ण सिटौला पक्षबाट उम्मेदवारी दिएका भीमसेनदास प्रधानले १ सय ९७ मत प्राप्त गरेका थिए ।