राष्ट्रियसभा सदस्य निर्वाचनका लागि लुम्बिनी प्रदेशमा नेकपा एमालेका उम्मेदवारले मनोनयन दर्ता गराएका छन् ।

एमालेको तर्फबाट दलित, महिला र अन्य गरी ३ पदमा मनोनयन दर्ता गराएको प्रदेश निर्वाचन कार्यालय दाङले जनाएको छ ।

दलिततर्फ गुल्मीका कृष्ण सुनार, महिलातर्फ बाँकेकी भारती उपाध्याय खनाल र अन्यतर्फ दाङका रामदयाल गुप्ताले मनोनयन दर्ता गराएका हुन् ।

राष्ट्रियसभा निर्वाचनमा सत्तापक्षीय गठबन्धन र एमालेका उम्मेदवारबीच प्रतिस्पर्धा हुने भएको छ । एमालेभन्दा अगाडि सत्तारुढ गठबन्धनले उम्मेदवारी दर्ता गराएका थिए ।

गठबन्धनका उम्मेदवार नेपाली कांग्रेसबाट बाँकेका युवराज शर्मा, नेकपा एकीकृत समाजवादीबाट पाल्पाकी राजेन्द्रलक्ष्मी गैरे र राष्ट्रिय जनमोर्चाबाट रुपन्देहीका तुलप्रसाद विश्वकर्मा रहेका छन् । तीनै जनाले क्रमशः अन्य, महिला र दलिततर्फ उम्मेदवारी दर्ता गराएका छन् ।

राष्ट्रिय सभाका ३ पदका लागि ६ जनाको उम्मेदवारी परेको छ । 

पार्टीको झण्डासहित समर्थकबीच मनोनयन दर्ता गर्न गठबन्धन र एमालेका उम्मेदवार मनोनयन स्थलमा पुगेका थिए । माघ १२ गते हुने निर्वाचनमा लुम्बिनी प्रदेशमा २९६ मतदाता छन् । जसमध्ये ८१ जना प्रदेशसभा सदस्य र २१५ जना स्थानीय तहका प्रमुख/उपप्रमुख, अध्यक्ष/उपाध्यक्ष रहेका छन् ।

राष्ट्रियसभा सदस्य निर्वाचनका लागि मनोनयन दर्ता गराउन राजनीतिक दलले दलबलसहित उपस्थिति देखाएका छन् । सत्ता गठबन्धनअन्तर्गत नेपाली कांग्रेस, माओवादी केन्द्र, नेकपा एकीकृत समाजवादी, राष्ट्रिय जनमोर्चाले पार्टीको झण्डा र ब्यानरसहित उपस्थिति देखाएका छन् ।

नेकपा एमालेले पनि मनोनयन दर्ताको क्रममा दलबलसहित उपस्थिति देखाएको छ । पार्टी विभाजनको असर भोगेको एमालेले ‘अपवित्र’ गठबन्धन भन्दै नाराबाजीसहित र्‍याली निकालेको छ ।