नेकपा एमालेका महासचिव शंकर पोखरेलले सत्तारुढ गठबन्धनलाई व्यंग्य गरेका छन् । 

सत्तारूढ गठबन्धनले स्थानीय तहको निर्वाचन कात्तिकमा सारेर आगामी बैशाखमा संसदको निर्वाचन गर्नेबारे छलफल चलाएकोमा एमाले महासचिवले व्यंग्य गरेका हुन् । 

उनले फेसबुकमा स्टेटस लेख्दै भनेका छन्, ‘पाँच वर्ष अगावै चुनाव गर्नु प्रतिगमन हो भन्ने सत्ता गठबन्धन स्थानीय चुनाव पछि सार्नेगरी वैशाखमै संसदको चुनाव गर्न तयार भए रे ।’

एमाले अध्यक्ष केपी ओली नेतृत्वको सरकारले दुई पटकसम्म संसद विघटन गरेर निर्वाचनको घोषणा गरेको थियो । तर, एमाले बाहेकका दलहरुले त्यसलाई प्रतिगमनको संज्ञा दिएर सडकमा प्रदर्शन गरेका थिए भने अदालतमा मुद्दा समेत लगेका थिए । 

त्यसबेला उनीहरुले संसद पूर्ण कार्यकाल चल्नुपर्ने तर्क गरेका थिए । 

अहिले सत्तारुढ दलका नेताहरुले एमालेको संसद चल्न नदिएको भन्दै बैशाखमा संसदीय निर्वाचन गरेर स्थानीय तहको निर्वाचन कात्तिकमा गर्दा पनि हुने तर्क  गर्न थालेका छन् ।