प्रशान्त महासागरमा रहेको मुलुक टोंगामा समुद्रमुनि ज्वालामुखी विस्फोट भएपछि सुनामी आएको छ । 

त्यसले गर्दा आएको लहरमा परेका एक अपांग व्यक्तिले २७ घन्टा पौडेर ज्यान जोगाएका छन् । राम्ररी हिँडडुल गर्न नसक्ने ती व्यक्ति ७.५ किलोमिटर पौडेर मुख्य टापुमा आइपुगेका थिए । 

टोंगाको मिडिया एजेन्सी ब्रोडकम ब्रोडकास्टिङलाई दिइएको रेडियो अन्तर्वार्तामा लिसाला फोलाऊ नामक व्यक्तिले आफू अटाटा टापुको निवासी भएको बताए । शनिवार साँझ ७ बजे ज्वालामुखी विस्फोटपछि आएको सुनामीले चर्को लहर ल्यायो र घरमा पेन्टिङ गरिरहेको बेलामा बगाएर लग्यो । 

उनी रुखमा चढेका थिए तर त्यसबाट खसे र ठूलो लहरले उनलाई बगाएर लग्यो । 

समुद्रमा बगे पनि उनले बाँच्ने आशा छोडेनन् र पौडिरहे । उनी बिस्तारै पौडिँदै मुख्य टापु तोंग टापुमा पुग्न सफल रहे । 

लिसालाको वीरताको कथा सामाजिक सञ्जालमा भाइरल भइरहेको छ । 

अटाटा टापु राजधानी नुकुआलोफाबाट आठ किलोमिटर उत्तरपश्चिममा छ । डुंगाबाट त्यहाँ पुग्न आधा घन्टा लाग्छ । 

टोंगाका जलसैन्य डुंगा साना टापुको सर्वेक्षण गरेर क्षतिको आकलन गरिरहेका छन् । कैयौं देशले टोंगालाई राहत सामग्री पठाएका छन् ।