अनलाइनमार्फत् जुवा खेलाउने कार्यमा संलग्न रहेको आरोपमा १२ जनालाई प्रहरीले पक्राउ गरेको छ ।

पक्राउ पर्नेहरूमा कीर्तिपुर नगरपालिका-६ चोभार बस्ने ३३ वर्षीय सुजेन्द्र थापा, १७ वर्षीय २ जना किशोर, २७ वर्षीया कविता थापा, ३० वर्षीय रबिन खड्का, सोही नगरपालिका-१० कीर्तिपुर बस्ने ४५ वर्षीय बुद्ध महर्जन,  सोही नगरपालिका-८ पाँगा बस्ने २० वर्षीया रोजा महर्जन, सोही ठाउँ बस्ने १९ वर्षीय साहिल महर्जन छन् ।

त्यस्तै कीर्तिपुर नगरपालिका-१० बस्ने १९ वर्षीया हनिशा महर्जन, सोही नगरपालिका-९ नगाउँ बस्ने ३५ वर्षीय प्रदिपमान सिंह बस्नेत,  काठमाडौं कीर्तिपुर बस्ने बझाङ केदारसिउ गाउँपालिका-५ घर भएका १९ वर्षीय बिनोद ठगुन्ना र काठमाडौं कीर्तिपुर बस्ने सिन्धुपालचोक मेलम्ची नगरपालिका-१३ घर भएकी १७ वर्षीया किशोरी रहेको प्रहरीले जनाएको छ । 

कीर्तिपुर नगरपालिका-६ चोभार, सोही नगरपालिका-९ नगाउँ र सोही नगरपालिका-१० बागभैरवस्थित विभिन्न घरहरूमा जुवा खेलाउने गरेको प्रहरीले जनाएको छ । 

काठमाडौं कीर्तिपुर नगरपालिकाको विभिन्न स्थानमा सम्पत्ति हारजित हुने गरी अनलाइन जुवा खेलाउँदै गरेको भन्ने सूचनाको आधारमा महानगरीय अपराध महाशाखा मीनभवनबाट खटिएको प्रहरीले विभिन्न घरतलासी गर्दा अनलाइन जुवा खेलाइरहेको अवस्थामा उक्त जुवा खेलाउन प्रयोग हुने १४ थान ल्यापटप, १७ थान मोबाइल,  कम्प्युटर मोनिटर २ थान, राउटर ३ थान, गेमिङ विवरण लेखिएका रजिस्टरहरू र २ थान बोर्ड लगायतका उपकरणहरूसहित उनीहरूलाई पक्राउ गरेको उनको भनाइ छ । 

पक्राउ परेकामध्ये  सुजेन्द्र थापा, प्रदिपमान सिंह बस्नेत र बुद्ध महर्जनले अनलाइन जुवा खेलाउनका लागि २४ सै घण्टा सिफ्टवाइज रुपमा अनलाइनमार्फत जुवा खेलाउनका लागि कर्मचारीहरू नै राख्ने गरेको प्रहरी अनुसन्धानबाट खुलेको छ । 

त्यसरी खटिएका कर्मचारीहरूले फेसबुक आइडीमार्फत् अमेरिकी तथा युरोपियन नागरिकहरूलाई साथी बनाई जुवा, फायर कायिरिङ, रिभर सुइप्स, रिभर मन्सटर, भेगास एक्सलगायतका अनलाइन जुवा खेल्न लिंक शेयर गरी उक्त गेममा अमेरिकी डलर लोड गर्न लगाई गेम खेलाउने तथा जित्ने पक्षलाई तोकिएको धनराशी समेत पुरस्कारको रुपमा दिने प्रहरीले जनाएको छ । 

करीब १० महिना अगाडिदेखि महिनाको करीब एक लाख अमेरिकी डलरभन्दा बढी रकम हारजित हुने गरी अनलाइन जुवा खेलाउने गरेको बुझिएको उक्त महाशाखाले जनाएको छ ।  

उनीहरूलाई आवश्यक कारवाहीका लागि महानगरीय प्रहरी परिसर काठमाडौं पठाइएको उक्त महाशाखाले जनाएको छ ।