रुसले एस–४०० क्षेप्यास्त्र प्रणालीका दुई डिभिजनहरू छिमेकी मुलुक बेलारुस पठाएको छ । शत्रुका युद्धविमानहरूलाई झार्नका लागि उपयोगी उक्त प्रणाली सैन्य अभ्यासमा सहभागी हुन पठाइएको रुसको रक्षा मन्त्रालयले पुष्टि गरेको छ । 

रुसको सुदूरपूवएमा रहेको खाबारोभ्स्क क्राइबाट रेलमार्ग हुँदै ती हतियारहरू बेलारुस लगिएको हो । 

सैन्य अभ्यास गरिने ठाउँमा क्षेप्यास्त्र आइपुगेपछि रुसी सैन्य बलहरूले प्रतिरक्षा तालिमका रूपमा आफ्नो पोजिसनलाई बलियो बनाउनेछन् । 

एस–४०० हतियार प्रणालीको विकास सन् १९८० को दशकको अन्त्यतिर गरिएको थियो र सन् २००७ देखि त्यो सेनामा समावेश गरियो । रुसले चीन, टर्की र भारतलाई उक्त हतियार बेचेको छ । 

अन्तर्राष्ट्रिय विश्लेषकहरूले एस–४०० जमीनबाट आकाशमा मार हान्ने सबभन्दा उम्दा रणनीतिक क्षेप्यास्त्र भएको बताउने गरेका छन् । अमेरिकाले यस हतियारका विरुद्ध आक्रामक पैरवी गर्ने गरेको छ । 

बेलारुसका सैनिकहरूसँग संयुक्त अभ्यास फेब्रुअरी महिनामा गर्ने घोषणा मस्कोले पहिल्यै गरिसकेको थियो । यी दुई मुलुकले सैन्य कारवाहीको समन्वय गर्ने क्षमतालाई बढाउन खोेजेका छन् । 

बेलारुससँग रुसको अभ्यासलाई युक्रेन आक्रमणको योजनाका रूपमा अमेरिकाको परराष्ट्र मन्त्रालयले व्याख्या गरेको छ । तर रुसले युक्रेनमाथि आक्रमण गर्ने आफूहरूको योजना नरहेको बताउँदै आएको छ ।