युक्रेनमा मस्कोले रुससमर्थक नेतालाई राष्ट्रपति बनाउन खोजेको बेलायतको परराष्ट्र मन्त्रालयले दाबी गरेको छ । रुसले युक्रेनमाथि आक्रमण गर्न लागेको भन्दै तनाव चर्किरहेको बेलामा यस्तो योजनाको खुलासा गरिएको हो । 

यस्तो दाबी गरे पनि प्रमाण दिन भने मन्त्रालयले सकेको छैन । 

विभिन्न पत्रिकाहरूलाई परराष्ट्र मन्त्रालयले इमेलमार्फत खबर पठाएर लन्डनको समयअनुसार साढे १० बजे रातिको इम्बार्गो राखेको थियो । 

युक्रेनका बहालवाला राष्ट्रपति भोलोदीमीर जेलेन्स्कीलाई विस्थापित गर्ने सम्भावित उम्मेदवारहरूको नाम पनि इमेलमा राखिएको छ । युक्रेनका पूर्वसांसद ४५ वर्षीय एभ्गेनी मुरायेभ विकल्पका रूपमा रहेको बताइएको छ । 

रुसका गुप्तचर निकायहरूले युक्रेनका पूर्व राजनीतिकर्मीहरूसँग सम्पर्क कायम गरेको दाबी परराष्ट्र मन्त्रालयले गरेको छ । सन् २०१४ मा पश्चिमले समर्थन गरेको हिंस्रक मैदान विरोध प्रदर्शनपछि विस्थापित भिक्टर यानुकोभिचसँग जोडिएका शीर्ष अधिकारीहरूको नाम पनि परराष्ट्र मन्त्रालयले लिएको छ । 

सन् २०१० देखि २०१४ सम्म प्रधानमन्त्री रहेका निकोलाइ आजारोभ, दुई पूर्व उपप्रधानमन्त्रीहरू र राष्ट्रिय सुरक्षा तथा प्रतिरक्षा परिषद्का पूर्व उपाध्यक्षको नाम पनि लिइएको छ । 

तर पार्टीगेट काण्डका कारण लोकप्रियता गुमाएका बोरिस जोनसनले विवादबाट ध्यान हटाउनका लागि यो प्रपञ्च रचेको हुन सक्ने कतिपयले अनुमान गरेका छन् ।