मोरङको सुन्दरहरैंचा नगरपालिका–४, बलियामा ३० वर्षीया महिलालाई अपहरण शैलीमा होटल लगेर सामूहिक बलात्कार गरेको आरोपमा प्रहरीले एक जनालाई पक्राउ गरेको छ । 

प्रहरीले श्रेष्ठ होटल एण्ड फेमिली लजका सञ्चालक ३६ वर्षीय अर्जुन श्रेष्ठलाई पक्राउ गरेको हो । 

जिल्ला प्रहरी मोरङका प्रवक्ता डएसपी मञ्जिल मुकारुङले फरार रहेका २७ वर्षीय मनोज श्रेष्ठ र झापाका रामबहादुर नेपालीको खोजी भइरहेको बताएका छन् । 

प्रहरीका अनुसार बलात्कृत हुने महिला इटहरीमा काम गरेर शुक्रवार साँझ सुन्दरहरैंचाको गछियास्थित बहिनीको घर जाने क्रममा बाटो झुक्किएकी थिइन् । बाटो बिराएपछि रामबहादुरले बहिनीको घरसम्म पुर्‍याइदिने भन्दै प्रदेश २–०१–००१च २२७ नम्बरको गाडीमा चढाएर होटलमा लगेको खुलेको प्रहरीको प्रारम्भिक बयानबाट खुलेको छ । प्रहरीका अनुसार होटलमा महिलालाई कुटपिट गर्दै बेहोस पारेर सामूहिक बलात्कार गरेको अनुसन्धानबाट खुलेको छ ।

शनिवार बिहान महिलाले बहिनीलाई खबर गरेकी थिइन् । उनकी बहिनी होटल पुग्दा कोठामा रगत देखेपछि बहिनीले प्रहरीलाई खबर गरेकी थिइन् । उनको कोशी अस्पताल विराटनगरमा उपचार भइरहेको प्रहरीले जनाएको छ । उनीसँगै आएका होटल सञ्चालक श्रेष्ठलाई प्रहरीले अस्पतालबाटै नियन्त्रणमा लिएको छ । 

पीडित महिलाको शरीरभरि निलडाम देखिनुका साथै यौनांगमा गम्भीर चोट रहेकाले रक्तस्राब भएको उपचारमा संलग्न चिकित्सकले बताएका छन् । पीडितको उजुरीका आधारमा घटनाको अनुसन्धान थालिएको प्रहरीले जनाएको छ ।