शेयर बजार परिसूचक नेप्से सोमबार एकैदिन १०० अंकले घट्नुलाई लगानीकर्ताहरूले नाफा बूक भनेका छन् । आत्तिइहाल्नुपर्ने अवस्था नआएको शेयर लगानीकर्ताका अगुवा बताउँछन् ।

नेपाल इन्भेस्टर्स फोरमका अध्यक्ष छोटेलाल रौनियारका अनुसार कुनै सिरियस विषय होइन, महत्त्वपूर्ण एजेन्डा पनि कुनै नआएको हुँदा बजारमा करेक्सन मात्रै भएको हो । 

उनले भने, ‘पहिलो विषय त प्रोफिट बूक हो भने त्यसपछि राष्ट्र बैंकले जारी गरेको क्रिप्टोकरेन्सीमा कारोबार गर्न नपाउने विषयको हल्ला पनि हो ।’

रौनियारले लगानीकर्ताले आत्तिएर बजारबाट भाग्नुपर्ने अवस्था नभएको तर्क गरे । ‘नयाँ नीति वा एजेन्डा पनि केही आएको छैन, कुनै बियरिस ट्रेन्ड पनि हैन, त्यसैले अहिलेको अवस्था सामान्य नै हो । पछिल्लो समय बजार बढिरहेकाले बजार अझै बढ्ने हुँदा लगानीकर्ताले हतास मनस्थिति बनाउनुपर्ने अवस्था छैन,’ रौनियारले भने ।

अर्का लगानीकर्ता तथा इन्भेष्टर्स फोरमका उपाध्यक्ष तुलसीराम ढकालले आज प्रोफिट बूक गर्ने हाबी हुँदा शेयर बजारमा करेक्सन आएको हो ।

‘अहिले कुनै पनि लगानीकर्ताले आत्तिएर शेयर बेचिहाल्नुपर्ने अवस्था आएको होइन,’ उनले भने । चुनाव भनेको ६ महिना अगाडि वा पछाडि हुने विषय भएको हुँदा यसले लगानीकर्तालाई केही फरक नपर्ने उनको बुझाइ छ ।

सामान्य करेक्सनमा आत्तिनु आवश्यक नभएको उनको भनाइ छ ।

२९ सय देखि ३ हजारको सूचकमा सय/पचास अंक घट्नुलाई सामान्य मान्नुपर्ने पनि ढकालको भनाइ छ ।

‘एक दुईदिन कुर्दा धेरै नाफा हुन्छ भनेर लगानीकर्ता बस्छन्, त्यसमा पनि २३ सय अंक पुग्दा किनेका लगानीकर्ताले २८ सयमा प्रोफिट बुक गर्छन् । अझै बढीमा किन्नेले अझै केही समय पर्खेर बस्छन्, यो सामान्य प्रक्रिया हो,’ ढकालले भने ।