सशस्त्र प्रहरी बल नेपालमा एक जना अतिरिक्त महानिरीक्षक (एआईजी) को दरबन्दी थप्ने तयारी गरिएको छ । 

नेपाल प्रहरीमा ३ जना एआईजी थप हुने पक्कापक्की भएपछि सशस्त्र प्रहरीले पनि एक जना एआईजी थप गर्न संगठन व्यवस्थापन तथा सर्वेक्षण (ओएण्डएम) गरेर गृह मन्त्रालय पठाएको छ । 

गृह मन्त्रालय स्रोतका अनुसार अर्थ मन्त्रालयमा स्वीकृतिका लागि फाइल पुगेको छ । 

पछिल्लो समयमा आउट बोर्डर पोष्ट (बीओपी) को संख्या थप भएसँगै त्यसलाई हेर्ने छुट्टै विभागको आवश्यकता भएको भन्दै कार्य तथा सीमा विभागको नेतृत्व एआईजीले गर्नुपर्ने ओएण्डएमले औंल्याएको छ । 

सशस्त्र प्रहरी हेडक्वार्टरका उच्च अधिकृतको भनाइलाई आधार मान्ने हो भने सशस्त्र प्रहरी महानिरीक्षक (आईजीपी) शैलेन्द्र खनाल आफू अवकाश भएर जाने समयमा आफू अनुकूलको आईजीपी सिफारिस गरेर जानका लागि एआईजी थप्ने दौडमा लागेका हुन् । 

डीआईजी खड्गजीत राई र मन्दीप श्रेष्ठ माघ २६ गते अनिवार्य अवकाशमा जाँदैछन् । आईजीपी खनालले भने १० दिनभित्र एआईजीको दरबन्दी थप गरेर मन्दीप श्रेष्ठलाई एआईजी बनाउने दाउमा रहेको स्रोतले लोकान्तरलाई बतायो । 

यदि एआईजीमा मन्दीप श्रेष्ठ बढुवा भए आगामी चार वर्ष उनी आईजीपी हुनेछन् । 

आईजीपी खनाल जसरी पनि आफू अवकाश पाएर जाने समयमा आफू अनुकूलको एआईजी बनाएर जाने खेलमा लागेको स्रोतले बतायो । 

अहिले सशस्त्र प्रहरी बलमा एआईजीको दाैडमा सिनियर डीआईजीहरू राजु अर्याल, नारायणदत्त कँडेल र चन्द्रप्रकाश गाैतम छन् । उनीहरू तीनजनामध्येबाट एक जना भविष्यमा सशस्त्रको प्रहरी प्रमुख बन्नेछन् ।​ संगठनभित्र तीनै जना अब्बल अधिकृत मानिन्छन् ।