रूपन्देहीको तिलोत्तमा नगरपालिका–४ डिङ्गरनगर र बुटवल उपमहानगरपालिका–१७ हरिहरपुरलाई जोड्ने गरी तिनाउ नदीमा पुल निर्माण शुरू भएको छ ।

२ वर्षभित्र निर्माण सम्पन्न हुने पुलको लागत २० करोड ६४ लाख रुपैयाँ रहेको छ ।

सडक विभाग अन्तर्गत ठेक्का भएको पुलको लम्बाई २०० मिटर छ । 

४ स्पान रहने पुल पाइल फाउन्डेसनको आधारमा निर्माण हुने गरी डिजाइन गरिएको जनाइएको छ । प्रिस्टेस ब्रिजको ११ मिटर चौडाईमा साढे ३ मिटर फूटपाथका लागि छुट्याइएको छ ।

पूर्व उपप्रधान तथा अर्थमन्त्री एवं प्रतिनिधिसभा सदस्य विष्णु पौडेलको पहलमा बन्न लागेको डिङ्गरनगर–हरिहरपुर तिनाउ नदी पुलको निर्माण कार्यले स्थानीय वासिन्दाको आवागमनमा ठूलो सहजता ल्याउने तिलोत्तमा नगर प्रमुख बासुदेव घिमिरेले बताए ।  

केही वर्षयता तिनाउ तथा दानव नदीमा एकपछि अर्को स्थानमा पुल निर्माण भइरहेका छन् । यी पुलको निर्माणले समग्रमा रुपन्देहीवासी नै लाभान्वित भएका छन् ।

दूरीले नजिक भएर पनि पुल नहुँदा समस्या भोग्दै आएका वासिन्दा पुलको निर्माणबाट लाभान्वित भएका छन् ।