जुम्लाको तातोपानी गाउँपालिकाले अतिविपन्न स्थानीयलाई निःशुल्क स्वास्थ्य बीमा कार्यक्रम शुरू गरेको छ ।

जनतासँग अध्यक्ष कार्यक्रमअन्तर्गत आर्थिक वर्ष २०७८/७९ को साउनदेखि अतिविपन्न नागरिकलाई निःशुल्क स्वास्थ्य बीमा कार्यक्रम शुरू गरिएको गाउँपालिका अध्यक्ष नवराज न्यौपानेले बताए ।

कार्यक्रमको १० लाख रुपैयाँ बजेटमा अतिविपन्न नागरिकलाई निःशुल्क स्वास्थ्य बीमा गरिएको हो । उनले भने, ‘आर्थिक अभावले स्वास्थ्य बिमा नगरेका गाउँपालिकाका ८ वटै वडाभित्रका अतिविपन्न नागरिकलाई लक्षित गरेर प्रतिपरिवार बीमा गर्दाको बीमांक रकम ३ हजार ५०० मध्ये १ हजार ५०० सम्बन्धित व्यक्ति आफैंले र २ हजार गाउँपालिका व्यहोर्ने गरी स्वास्थ्य बिमा कार्यक्रम लागू गरिएको अध्यक्ष न्यौपानेले बताए ।

गाउँपालिका भित्रका ८ वटा वडामा स्वास्थ्य बीमाकर्ता परिचालन गरी निःशुल्क स्वास्थ्य बिमा कार्यक्रम सञ्चालन भइरहेको प्रमुख प्रशासकीय अधिकृत मिलन बुढ्थापाले जानकारी दिए । उनले भने, ‘८ बीमाकर्ता परिचालन गरेका छौं । अतिविपन्न नागरिकको अनिवार्य निःशुल्क स्वास्थ्य बीमा गर्न भनिएको छ ।’

तातोपानी गाउँपालिका–३ का रेवती रावलका अनुसार हालसम्म वडाका ५० अतिविपन्न नागरिकलाई निःशुल्क स्वास्थ्य बिमा गरिसकिएको उनको भनाइ थियो ।

जिल्लामा ५५ हजार ३५२ नागरिकले स्वास्थ्य बीमा गरेको स्वास्थ्य बिमा कार्यालयका प्रमुख प्रेम भण्डारीले बताए ।