सामाजिक सुरक्षा भत्ता वितरण गर्नका लागि ल्याएको ५३ लाख रकम हिनामिना गरेको भन्दै अख्तियार दुरुपयोग अनुसन्धान आयोगले नुवाकोटको पंचकन्या गाउँपालिकाको वडा सचिवसहित ३ जना विरुद्ध मुद्दा दर्ता गरेको छ । 

पंचकन्या गाउँपालिका-२ का वडा सचिव सरिता राउत, कार्यालय सहायक रामकुमार गिरी र कार्यालय सहयोगी नीलप्रसाद मिश्र विरुद्ध अख्तियारले शुक्रवार विशेष अदालतमा मुद्दा दर्ता गरेको हो ।

२०७७ पुस २४ गते राति सामाजिक सुरक्षा भत्ता वितरण गर्न भनी ल्याएको रकम र विभिन्न शीर्षकबाट उठेको राजश्व रकम शंकास्पद रुपमा हराएको घटनाका सन्दर्भमा अनुसन्धान गर्दा बदनीयतपूर्वक रकम हिनामिना गरेको खुलेको अख्तियारले जनाएको छ । 

अख्तियारका अनुसार तीनै जनाको रोहवरमा कार्यालयको दराजको सेफमा रकम राखिएको र  ढोकाको साँचो मिश्रले बोकेका थिए । 

दराजको साँचो राख्ने ठाउँमा कुनै पनि किसिमको तोडफोड नभएको, सुरक्षा निकायलाई समेत कुनै जानकारी नगराएको, सुरक्षाको लागि समन्वय समेत नगरेको अनुसन्धानबाट देखिएको छ । 

५३ लाख एक हजार ८५६ रूपैयाँ हिनामिना गरेको भन्दै असूल उपरको मागसहित अख्तियारले भ्रष्टाचारको मुद्दा दर्ता गरेको हो ।