मोरङको धनपालथान गाउँपालिका–७ को उखुबारीमा खाल्डो खनेर गाडिएको अवस्थामा फेला परेको अर्को शवको पनि पहिचान खुलेको छ । गत बुधवार उखुबारीबाट उत्खनन गरिएको ३५ वर्षीय पुरुषको शवको पहिचान खुलेको हो ।

मृतक व्यक्ति सप्तरीको शम्भुनाथ गाउँपालिका–४  घर भई काठमाडौं बस्ने शम्भु चौधरी रहेको जिल्ला प्रहरी कार्यालय मोरङका प्रहरी उपरीक्षक जर्नादन जिसीले बताए । 

उखुबारीमा गाडेको अवस्थामा प्रहरीले बुधवार राति एउटा र बिहीवार दिउँसो अर्को शव फेला पारेको थियो । 

बिहीवार खाल्डोबाट निकालिएको शवको साथमा भेटिएको कागजातका आधारमा राजेन्द्र श्रेष्ठ रहेको पहिचान खुलेको हो । 

प्रहरी उपरीक्षक जिसीका अनुसार  मृतक दुवैजना साथी–साथी हुन् । श्रेष्ठसँगै शम्भु पनि सम्पर्कविहीन थिए । 

श्रेष्ठको सम्पर्कका आधारमा प्रहरी शम्भुको परिवारसम्म पुगेको थियो । उनका आफन्तले आइतवार बिहान शवको पहिचान गरेका छन् । ‘उनीहरू सँगसँगै रहेको देखिन्छ,’ प्रहरी उपरीक्षक जिसीले भने, ‘हामी सूक्ष्म रूपमा अनुसन्धान गर्दैछौं ।’ 

धरान उपमहानगरपालिका–३ का ४९ वर्षीय श्रेष्ठ र शम्भुनाथ गाउँपालिका–४ का चौधरी जग्गा कारोबारी हुन् ।

शव नुन हालेर गाडीएको प्रहरीको भनाइ छ । शवमा बढी नुन हालेका कारण धेरै गलेको प्रहरीले जनाएको छ ।

उनीहरू मंसिर पहिलो साता काठमाडौंबाट सँगै विराटनगर आएको प्रहरीको प्रारम्भिक अनुसन्धानले देखाएको छ ।

बुधवार उखु काट्ने क्रममा कामदारले खाल्डो देखेपछि प्रहरीलाई खबर गरेका थिए । खबर पाएपछि पुगेको प्रहरीले बुधवार एउटा खाल्डोबाट चौधरीको शव फेला पारेको थियो । 

शव भेटिएको स्थानबाट करीब १५ मिटरको दूरीमा रहेको अर्को खाल्डोमा श्रेष्ठको शव गाडिएको अवस्थामा फेला परेको थियो ।