संविधान सभा सदस्य डा. दुमन सिंह थापाको ६२ वर्षको उमेरमा आइतबार राती  निधन भएको नेकपा एस अर्घाखाँचीका अध्यक्ष राम बहादुर चौहानले लोकान्तरलाई जानकारी दिए ।

अर्घाखाँचीबाट  थापा दोस्रो संविधानसभाको निर्वाचनमा नेकपा एमालेबाट निर्वाचित भएका थिए । काठमाडौंको हेम्स अस्पतालमा सघन उपचारको क्रममा निधन भएको हो ।  

थापालाई कोरोना संक्रमण भएको बताइएको छ ।  थापाको करिब दुई वर्षअघि मृगौला प्रत्यारोपण  भएको थियो ।

३ दिन अगाडि स्वास्थ्यमा समस्या आएपछि अस्पताल भर्ना गरिएको थियो । अर्घाखाँचीको नरपानीमा जन्मेका थापाले ०७० सालमा अर्घाखाँची क्षेत्र नम्बर २ बाट संविधान सभामा चुनाव जितेका थिए ।  

उनी पछिल्लो समय  नेकपा (एकीकृत समाजवादी) मा थिए ।