नेकपा माओवादी केन्द्रले एमालेका नेताहरूलाई एमसीसीबारे एक ठाउँमा उभिन प्रस्ताव गरेका छन् ।

संसद भवन नयाँ बानेश्वरमा नेकपा एमालेका अध्यक्ष केपी शर्मा ओली सहितको छलफलमा माओवादी केन्द्रका अध्यक्ष पुष्पकमल दाहाल ‘प्रचण्ड’ले संसदमा पेश भएको एमसीसीमा २ पार्टी एक ठाउँमा उभिन प्रस्ताव गरेका हुन् । 

संसद भवनमा प्रमुख प्रतिपक्ष दलको कार्यालयमा एमाले र माओवादी केन्द्रका शीर्ष नेताबीच करीब डेढ घण्टा छलफल भएको थियो ।

माओवादी केन्द्रका अध्यक्ष प्रचण्डका स्वकीय सचिव रमेश मल्लले भेटमा राष्ट्रिय मुद्दा र समस्या बनेको एमसीसी र सदन सञ्चालन गर्नेबारे छलफल भएको जानकारी दिए । 

छलफलमा २ पार्टीको विगतको समीक्षा गर्दै गर्ने तर राष्ट्रिय मुद्दामा एकै ठाउँमा उभिने वातावरण बनाउन प्रस्ताव गरिएको माओवादी स्रोतले बताएको छ ।

एमाले नेताहरूले भने निरन्तर संवाद जारी राख्नुपर्ने बताएका माओवादी नेताहरूको भनाई छ ।

एमालेले संसदमा आफ्नो उपस्थिति हुने वातावरण नबनेको बताएको थियो ।

संसद भवनभित्र ओलीको कार्यकक्षमा भएको छलफलमा शुरूमा माओवादी केन्द्रका अध्यक्ष प्रचण्ड र ओलीले एक्लाएक्लै संवाद गरेका थिए । 

त्यसपछि एमालेका तर्फबाट वरिष्ठ उपाध्यक्ष ईश्वर पोखरेल, उपाध्यक्षद्वय सुवासचन्द्र नेम्वाङ र विष्णु पौडेल सहभागी भएका थिए । 

माओवादी केन्द्रको तर्फबाट नेता नारायणकाजी श्रेष्ठ, देव गुरूङ र शक्ति बस्नेत छलफलमा सहभागी भएका थिए ।