प्रधानमन्त्रीको सरकारी निवास बालुवाटारमा भएको नेपाली कांग्रेस र नेकपा एमालेका नेताहरु बीचको छलफल सकिएको छ । 

छलफलमा संसद सुचारु गराउन एमाले तयार नभएको छलफलमा सहभागी सञ्चार तथा सूचना प्रविधि मन्त्री ज्ञानेन्द्र बहादुर कार्कीले बताए ।

एमाले अध्यक्ष केपी शर्मा ओलीले पुरानै शर्त दोहोर्‍याएको र त्यसमा निर्णय नपुगिएको उनले बताए ।

तर, एमाले र कांग्रेसले छलफल भने निरन्तर अगाडि बढाउन सहमत भएको बताइएको छ ।

‘६ महिनादेखि संसद अवरुद्ध छ । संसद चलाउन प्रतिपक्षको भूमिका महत्वपूर्ण हुन्छ । संसद चलाएर सबैको सहयोगमा एमसीसी अनुमोदन गरौ भन्ने प्रस्ताव प्रधानमन्त्रीले गर्नुभयो । तर, प्रतिपक्ष दलका नेता केपी शर्मा ओलीले पुरानै कुरा राख्नुभएको छ’, कार्कीले भने । 

एमाले अध्यक्ष केपी शर्मा ओलीले एमालेले संसद चल्न नदिएको कारण प्रधानमन्त्रीलाई पनि थाहा भएको भन्दै ती कारणको निराकरण नहुँदासम्म संसद चल्न नसक्ने बताएको कार्कीले जानकारी दिए ।

एमालेले आफूले कारबाही गरेको १४ जना सांसद संसदमा उपस्थित हुन नहुने वा उक्त कारबाहीको सूचना नटास्ने सभामुखले राजीनामा दिनुपर्ने शर्त राख्दै आएको छ । 

एमालेले अहिलेको सत्तारूढ गठबन्धन भत्काउन चाहेको छ । यसमा भने कांग्रेस सभापति शेरबहादुर देउवा पनि सहमत भइसकेका छन् । 

संसदलाई व्यवस्थित र प्रभावकारी बनाउन एमाले र कांग्रेसका नेताहरुबीचको वार्ता भने जारी राख्न नेताहरु सहमत भएको उनले बताए । 

संसद सुचारु गर्ने बारे छलफल भए पनि निश्कर्षमा भने पुग्न नसकिएको उनले बताए । 

दिउँसो बानेश्वरस्थित संसद भवनमा लामो छलफल गरेका एमाले र कांग्रेसका नेताहरु साँझ ७ बजे प्रधानमन्त्री निवास बालुवाटारमा छलफलका लागि पुगेका थिए । 

एमालेकातर्फबाट अध्यक्ष ओली, वरिष्ठ उपाध्यक्ष ईश्वर पोखरेल, उपाध्यक्षद्वय सुवास नेम्बाङ र विष्णु पौडेल छलफलमा सहभागी थिए ।

कांग्रेसकातर्फबाट सभापति एवं प्रधानमन्त्री शेरबहादुर देउवा, उपसभापति पूर्णबहादुर खड्का, महामन्त्री गगन थापा र केन्द्रीय सदस्य एवं सञ्चारमन्त्री ज्ञानेन्द्र बहादुर कार्की सहभागी भएका थिए ।