मोरङको रंगेली नगरपालिकाका मेयर दिलिप बगडिया (अग्रवाल) एमाले प्रवेश गर्ने भएपछि नेकपा (माओवादी केन्द्र)ले उनलाई कारबाही गरेको छ । 

मेयर बगडियालाई बुधवार एमाले अध्यक्ष केपी शर्मा ओलीले रंगेलीमा एक कार्यक्रम गर्दै पार्र्टी प्रवेश गराउँदै छन् । 

२०७८ फागुन १५ देखि लागू हुने गरी पार्टीको साधारण सदस्यबाट उनलाई निष्कासन गरेको माओवादी केन्द्र प्रदेश १ ले जनाएको छ । 

सर्वाेच्च अदालतको फैसलाबाट नेकपा एमाले र माओवादी केन्द्रको एकता भंग भएपछि बगडिया माओवादी केन्द्रका बैठक तथा भेलामा गएका थिएनन् । 

२०७४ सालको निर्वाचनमा रंगेली नगरपालिकामा बगडियाले ८ हजार ८६ मत प्राप्त गरी निर्वाचित भएका थिए । उनका निकटतम प्रतिद्वन्द्वी नेपाली कांग्रेसका मोदराज घिमिरेले ६ हजार १८६ मत प्राप्त गरेका थिए । रंगेलीमा नेकपा एमाले तेस्रो स्थानमा थियो । 

एमालेका उम्मेदवार सन्तोषकुमार साहले ३ हजार १२१ मत प्राप्त गरेका थिए । 

नेकपा माओवादी केन्द्रका उपप्रमुखका उम्मेदवारभन्दा करीब २८ सय मत बढी मत बगडियाले पाएका थिए । 

पार्टी नगर कमिटी इन्चार्ज समेत रहेका अग्रवालले पार्टी कमिटीलाई क्षति पुग्ने गतिविधि गर्दै पार्टीको शक्ति र नगर प्रमुखको शक्तिलाई आफ्नो व्यावसायिक स्वार्थमा प्रयोग गर्न खोजेको आरोप लगाँउदै उनलाई कारवाही गरिएको माओवादी केन्द्र प्रदेश १ अध्यक्ष हर्कबहादुर नेम्वाङले विज्ञप्ति जारी गरेर जनाएका छन् । 

गत वैशाखमा उनलाई रंगेली नगर कमिटी इन्चार्जको जिम्मेवारीबाट निलम्बन गर्दै स्पष्टीकरण समेत सोधिएको थियो । उनले स्पष्टीकरणमा भने पालिकाको कामले पार्टीमा समय दिन नसकेको र पार्टी हित विपरीत जाने आफ्नो मनसाय नरहेको भनेर जवाफ पठाएका थिए । 

बगडियालाई रंगेली नगरपालिकाको प्रमुखबाट हटाउन निर्वाचन आयोगलाई सिफारिससमेत गरेको माओवादी केन्द्रले जनाएको छ । 

यस्तै रंगेलीकै उपमेयरसमेत एमालेमा प्रवेश गर्ने हल्ला चले पनि उपमेयरलाई भने हालसम्म माओवादीले कारवाही गरेको छैन । 

रंगेलीका मेयर–उपमेयर, दक्षिणी क्षेत्रका जनप्रतिनिधिसहित ५ हजार कार्यकर्ता प्रवेश गर्ने एमाले मोरङका अध्यक्ष ऋषिकेस पोख्रेलले दाबी गरे ।