जनता समाजवादी पार्टी (जसपा) नेपालले शीर्ष ३ नेतालाई समेटेर पार्टी ‘हेडक्वार्टर’ गठन गरेको छ ।

‘हेडक्वार्टर’मा संघीय परिषद् अध्यक्ष डा. बाबुराम भट्टराई, केन्द्रीय कार्यकारिणी समिति अध्यक्ष उपेन्द्र यादव र वरिष्ठ नेता अशोक राई सदस्य रहनेछन् ।

सोमवार बसेको केन्द्रीय समिति बैठकले कार्यकारिणी वा केन्द्रीय समिति बैठक बस्न नसक्ने र तत्काल निर्णय लिनुपर्ने अवस्था भएमा हेडक्वार्टरले निर्णय गर्नसक्ने निर्णय गरेको अध्यक्ष उपेन्द्र यादवले लोकान्तरलाई जानकारी दिए ।

उनका अनुसार बैठकले निर्वाचन निर्देशिका समेत पारित गरेको छ । निर्देशिकाअनुसार हरेक पालिकामा चुनाव केन्द्रित गर्दै केन्द्रीय सदस्य खटाउने र चुनावी तालमेल हुनसक्ने ठाउँमा तालमेल गर्ने निर्णय गरिएको छ ।