संघदेखि प्रदेशसम्म सरकारमा रहेको जनता समाजवादी पार्टी (जसपा) गत आर्थिक वर्षमा १ करोड २२ लाख ३० हजार ५०१ रुपैयाँ घाटामा गएको पाइएको छ ।

संघीय सरकारमा सहभागी हुनुका साथै पछिल्लो ४ वर्षदेखि मधेश प्रदेश (साविक प्रदेश २) को नेतृत्व गरिरहेको पार्टीको हिसाबकिताब घाटामा चलिरहेको पाइएको हो ।

आर्थिक वर्ष २०७७/०७८ मा जसपाको कुल आम्दानी ७७ लाख ४ हजार ४०६ रुपैयाँ रहेकोमा कुल खर्च १ करोड ९९ लाख ३४ हजार ९०७ रुपैयाँ भएको देखिन्छ ।

यसबीचमा १ करोड २२ लाख  ३० हजार ५०१ रुपैयाँ घाटा भएको छ ।

अघिल्ला आर्थिक वर्षको वचतबाट जसपाको खातामा ८० लाख २२ हजार ४५१ रुपैयाँ मौज्दात रहेको पार्टीको लेखा परीक्षण प्रतिवेदनमा उल्लेख छ ।

जसपाले सदस्यता शुल्क तथा सदस्यता नवीकरण शुल्कबाट ६० हजार रुपैयाँ, कार्यगत लेभीबाट २८ लाख ८० हजार रुपैयाँ गरी कुल २९ लाख ४० हजार रुपैयाँ सदस्यता तथा लेभीबाट आम्दानी गरेको प्रतिवेदनमा उल्लेख छ ।

त्यसबाहेक अन्य चन्दा तथा सहयोगबाट ६ लाख ६७ हजार रुपैयाँ आम्दानी भएको प्रतिवेदनमा उल्लेख गरिएको छ ।

त्यसैगरी जसपाले जीप बिक्री गरेर ३३ लाख ७९ हजार २ सय रुपैयाँ आम्दानी गरेको छ । तर १ करोड २४ लाख रुपैयाँको सवारी साधन खरिद गरिएको छ ।

क्यान्टिन भाडाबाट १ लाख ६५ हजार रुपैयाँ, बैंकको ब्याजबाट १ लाख ६१ हजार १७६ रुपैयाँ र अन्य सवारी साधन बिक्रीबाट १ लाख ७० हजार ८ सय रुपैयाँ आम्दानी भएको छ ।

पार्टीको प्रवास विशेष समितिबाट २ लाख २१ हजार २३० रुपैयाँ अनुदानबापत आय गरेको प्रतिवेदनमा उल्लेख छ।

केमा कति खर्च ?

जसपाले घर बहालमा मात्र १६ लाख ५० हजार रुपैयाँ खर्च गरेको छ ।

स्टेशनरी तथा छपाइमा ४ लाख २४ हजार १० रुपैयाँ, बिजुली तथा पानी महशुलमा १४ हजार २२ रुपैयाँ, यातायात तथा भ्रमणमा ११ हजार ८१७ रुपैयाँ, लेखा परीक्षणमा २२ हजार ६०० रुपैयाँ खर्च भएको छ ।

पार्टीको बैठक सञ्चालन गर्दा जलपान तथा पाहुना खर्च समेतमा १ लाख १२ हजार २३५ रुपैयाँ, अन्य कार्यालय खर्च (मर्मत सम्भार) समेतमा २ लाख ९० हजार ५८७ रुपैयाँ, इन्धनमा ३६ हजार रुपैयाँ, बैंकको ब्याजमा ८ हजार ५८ रुपैयाँ, विविधमा ८ लाख १ हजार ६८ रुपैयाँ खर्च भएको प्रतिवेदनमा उल्लेख छ ।

यसैगरी सेमिनार तथा मिटिङमा २० हजार र आन्दोलन गर्दा १ लाख ६२ हजार १५० रुपैयाँ खर्च भएको प्रतिवेदनमा उल्लेख छ ।

अन्य कार्यालय खर्च (ह्रास कट्टी)मा २७ लाख ८७ हजार २२३ रुपैयाँ, कार्यालयमा कार्यरत कर्मचारीको तलब तथा दशैं भत्तामा ४ लाख १४ हजार १४२ रुपैयाँ खर्च भएको लेखा परीक्षण प्रतिवेदनमा उल्लेख छ ।

बैंकमा ८० लाख २२ हजार मौज्दात

विभिन्न बैंक तथा वित्तीय संस्थामा पार्टीका नाममा ८० लाख २२ हजार ४५१ रुपैयाँ मौज्दात छ ।

राष्ट्रिय वाणिज्य बैंक लिमिटेडमा ६१ लाख ५८ हजार ९७८ रुपैयाँ, कृषि विकास बैंकमा १३ लाख २७ हजार १६१ रुपैयाँ, अन्य नगद, पेटी क्याससहित कुल ८० लाख २२ हजार ४५१ रुपैयाँ नगद मौज्दात रहेको प्रतिवेदनमा उल्लेख छ ।

अघिल्लो आर्थिक वर्षमा भने बैंकमा १ करोड ६७ लाख १ हजार ५१७ रुपैयाँ मौज्दात रहेको थियो । वार्षिक घाटा त्यहीँबाट पूर्ति हुँदा पार्टीको बैंक मौज्दात घटेको हो ।

पण्डित एन्ड एसोसिएट्सका लेखा परीक्षक भक्तबहादुर पण्डितले गरेको लेखा परीक्षणको प्रतिवेदनमा पण्डितसँगै जसपाका अध्यक्ष उपेन्द्र यादव, कार्यालय प्रमुख प्रकाश अधिकारी र लेखा अधिकृत सुरेन्द्रकुमार दीपकको संयुक्त हस्ताक्षर छ ।