‘चिसो एष्ट्रे’ लाई नेपाली कलाकारले हलिउड चलचित्रसँग दाँजेका छन् । 

मंगलवार साँझ सिभिलमलको क्यूएफएक्स सिनेमामा भएको प्रिमियरमा फिल्म हेरेपछि प्रतिक्रिया दिँदै सेलिब्रेटीले फिल्मको कथा वाचन र दृश्य भाषा हलिउडस्तरको भएको प्रतिक्रिया दिएका हुन् । 

कलाकार सन्तोष पन्तले फिल्म हेरिरहँदा आफूलाई नेपाली होइन हलिउड फिल्म हेरिरहेको भान भएको प्रतिक्रिया दिए । उनले युवा पुस्तालाई केन्द्रमा राखेर बनाएको फिल्म क्वाँटी जस्तै सबै कुराको मात्रा मिलेको र आफूलाई असाध्यै राम्रो लागेको बताए । 

निर्देशक प्रदीप भट्टराईले पनि नेपाली सिनेमा हलिउड जस्ता किन बन्दैनन् भन्ने दर्शकका लागि ‘चिसो एष्ट्रे’ जवाफ भएको बताएका थिए ।

‘सीधा भाषामा भन्दा यो हलिउड स्टाइलको सिनेमा हो । लुटपछि यसको शैली ब्रेक गर्ने जुन फिल्मको हामी खोजी गरिरहेका थियौँ त्यो यही सिनेमा हो,’ उनले भने,  ‘सिनेमाको दृश्य भाषामा यो ठूलो फड्को हो ।’

निर्देशक निश्चल बस्नेतले भने निर्देशक दिन्स पाल्पालीको प्रशंसा गर्दै यो फिल्मको सोचाइ र सोचाइलाई पर्दामा उतार्न निर्देशकले गरेको मेहनत प्रशंसनीय रहेको धारणा राखेका थिए । 

महानायक राजेश हमालले अब्स्ट्रयाक्ट सिनेमा आफ्नो रोजाइमा रहने गरेको बताउँदै फिल्मले काठमाडौँ खोल्डोलाई दृश्यको माध्यमबाट हेरेको बताए ।

‘पहिलो कुरा त यो मेरो स्वादमा पर्‍यो । ग्रिपिङ छ । कलाकारको काम एकदमै राम्रो छ । मलाई मनपर्‍यो,’ उनले भने । 

साहित्यकार कुमार नगरकोटीले पनि यत्तिको सशक्त नेपाली फिल्म आफूले पछिल्लो समय नहेरेको बताउँदै यसको संवाद, विम्ब आदि प्रभावशाली रहेको बताए ।

अभिनेता खगेन्द्र लामिछानेले पनि आफूले हेर्ने र गर्नेभन्दा फिल्म पृथक रहेको बताएका थिए । उनले पनि कथा भन्ने शैली फरक रहेको प्रतिक्रिया दिएका थिए । 

फिल्मका निर्माता महेशबाबु तिमिल्सिनाले धेरै वर्षको मेहनत सार्थक भएको महसुश गरिरहेको बताएका छन् । 

‘हामीले अलि फरक शैलीको फिल्म बनाउने प्रयास गरेका थियौँ । फिल्म फ्रटिनिटीबाट स्याबास पायौँ । अब दर्शकको प्रतीक्षा छ,’ उनले भने । 

कवि भूपी शेरचनको ‘चिसो एष्ट्रे’ शीर्षकको कविताको भावलाई कथानक स्वरुप दिई निर्माण गरेको सिनेमा दिन्स पाल्पालीको निर्देशनमा बनेको हो । 

फिल्मलाई उज्जवल बस्ताकोटीले खिचेका हुन् । अजर जंगमको संगीत रहेको फिल्ममा दिव्य देव, सुशील पाण्डे सृष्टि श्रेष्ठ, निकुन श्रेष्ठ, नबिन लम्साल र रविन तामाङको मुख्य भूमिका छ । 

प्रिमियरअघि भूपि पत्नी कान्ति शेरचनलाई दोसल्ला ओढाइ सम्मान गरिएको थियो । उनले भूपीको कविताको भावलाई लिएर सिनेमा बन्नु नै सुन्दर पक्ष रहेको बताएकी थिइन् । 

कंगारु क्रिएसन, लोकल सिनेमा र क्रिएटिभ नेपाल फिल्मस् संयुक्त प्रयासमा महेशबाबु निर्मित चलचित्रलाई प्रबिङ स्याङ्बो र सुष्मिता पराजुलीले निर्माणमा सघाएका छन् । 

फिल्म निर्माणमा उत्पल झा, रुपेश ढुंगाना, नविन ढुंगाना र सुजन खतिवडाको पनि सहकार्य रहेको छ ।