बलिउड फिल्म निर्माता तथा ‘द कश्मीर फाइल्स’का निर्देशक विवेक अग्निहोत्रीलाई ‘वाई’ श्रेणीको सुरक्षा प्रदान गरिएको छ । उनको सुरक्षाका लागि चारदेखि पाँचवटा सशस्त्र कमाण्डो तैनाथ गरिएको छ । 

प्रवास तथा पूरै भारत यात्राका क्रममा उनलाई सीआरपीएफले सुरक्षा दिनेछ । 

विवेक अग्निहोत्रीले नै १९९० को दशकमा कश्मीरी पण्डित समुदायको नरसंहारका पीडितहरूको पहिलो पुस्ताको भिडियो अन्तर्वार्तामा आधारित 'द कश्मीर फाइल्स' बनाएका हुन् । 

किन पाए सुरक्षा ?

बक्स अफिसमा सय करोडको आँकडा पार गरेको फिल्मले देशभरबाट ठूलो समर्थन पाएको छ । 

प्रधानमन्त्री नरेन्द्र मोदी र केन्द्रीय गृहमन्त्री अमित शाहले पनि कश्मीरी पण्डितहरूको संघर्ष र पीडा देखाउने फिल्म र निर्देशक विवेक अग्निहोत्रीको प्रशंसा गरेका छन् । 

स्रोतहरूलाई मान्ने हो भने केन्द्रीय गुप्तचर एजेन्सीहरूले खतराको पूर्वानुमान गर्दै कश्मीरी फाइल्सका निर्देशक विवेक अग्निहोत्रीलाई भीआईपी सुरक्षा दिन सिफारिस गरेका हुन् । 

के हो वाई सुरक्षा ?

गृह मन्त्रालयले खुफिया ब्यूरो (आईबी) को सिफारिसमा प्रत्येक वर्ष विशिष्ट व्यक्तिहरूको सुरक्षाको समीक्षा गर्ने गर्छ ।

खतराको स्तरलाई हेरेर विशिष्ट र अतिविशिष्ट व्यक्तिहरूलाई विभिन्नस्तरको सुरक्षा दिइन्छ ।

भीआईपी सुरक्षालाई ध्यानमा राख्दै उनीहरूलाई विभिन्न श्रेणीको सुरक्षा दिइएको हुन्छ । ठूला नेता र पदाधिकारीलाई कस्तो सुरक्षा दिने भन्ने निर्णय गर्ने अधिकार सरकारलाई छ ।

भारतमा सुरक्षा प्रणालीलाई विभिन्न वर्गहरूमा वर्गीकृत गरिएको छ । यसमा एसपीजी सुरक्षा, जेठ प्लस, जे, वाई र एक्स श्रेणी समावेश छ । 

वाई वर्ग सुरक्षाको तेस्रो स्तर हो । यो सुरक्षा कम जोखिम भएका मानिसहरूलाई दिइएको हुन्छ । 

यसमा कुल ११ सुरक्षाकर्मी हुन्छन्, जसमा दुई पीएसओ (निजी सुरक्षा गार्ड) र एक वा दुई कमाण्डो तैनाथ हुन्छन् ।