राष्ट्रिय खेलकुद परिषद् (राखेप) को नयाँ प्रशासनिक भवनको उद्घाटन गरिएको छ ।

राखेपको ५८औं वार्षिकोत्सवको अवसर पारेर युवा तथा खेलकुद मन्त्री महेश्वर गहतराज ‘अथक’ले प्रशासनिक भवनको उद्घाटन गरेका हुन् ।

त्रिपुरेश्वरस्थित दशरथ रंगशाला परिसरमा रहेको राखेपको भवन उद्घाटन गर्दै मन्त्री अथकले नवौं राष्ट्रिय प्रतियोगिताको तयारीमा जुट्न निर्देशन दिए ।

मन्त्रालयले कार्यविधि बनाएर प्रतियोगिता सञ्चालनको प्रक्रिया शुरू गरेको बताउँदै मन्त्री अथकले आगामी जेठको १५ गतेभित्रै प्रतियोगिता सम्पन्न गर्ने गरी युद्धस्तरमा तयारी थाल्न आग्रह गरे ।

जेठ १५ गतेसम्म राष्ट्रिय प्रतियोगिता सम्पन्न भए त्यसलगत्तै एसियन गेमको तयारीका लागि खेलाडीलाई बन्द प्रशिक्षणमा राखी युद्धस्तरको तयारीमा लाग्ने योजनामा रहेको मन्त्री अथकले बताए ।

अदालतका कारण थुप्रै कठिनाइको सामना गर्नु परिरहेकोतर्फ इङ्गित गर्दैै मन्त्री अथकले त्यसलाई चिरेर मन्त्रालय अघि बढ्न प्रतिबद्ध रहेको समेत प्रस्ट पारे ।

कर्मचारीबाटै राखेपको नेतृत्व गर्ने अवस्था सिर्जना हुनु आफैंमा सकारात्मक पक्ष रहेकाले यो अवसरलाई पर्याप्त मात्रामा सदुपयोग गर्न समेत मन्त्री अथकले सुझाव दिए । आगामी दिनमा कर्मचारी भित्रबाटै राखेपले नेतृत्व पाउने गरी ऐन संशोधनका लागि पहल भइरहेको समेत उनले जानकारी दिए ।

‘तपाईंहरू भित्रबाटै नेतृत्व छनोट हुने गरी छलफल चलाएका छौं,’ कर्मचारीहरूको हौसला बढाउँदै मन्त्री अथकले भने, ‘कार्यकारी पदमा पुग्ने उद्देश्य राखेर निरन्तर काम गर्दै जानुहोस् ।’

राज्यले खेललाई अनुत्पादक क्षेत्रका रूपमा हेर्ने गरेको मन्त्री अथकको गुनासो थियो । खेल क्षेत्रलाई उद्योगका रुपमा विकास गर्नुपर्नेमा उनले जोड दिए । 

जनसम्बन्धको भरपर्दो माध्यमका रूपमा समेत रहेको खेल क्षेत्रको विकासमा राज्यले उचित ध्यान दिनुपर्ने बताउँदै मन्त्री अथकले आगामी आर्थिक वर्षमा खेल क्षेत्रको बजेट बढाउन प्रधानमन्त्री तथा अर्थमन्त्रीसँग निरन्तर संवाद भइरहेको जानकारी दिए ।