नेकपा एमाले अध्यक्ष तथा पूर्व प्रधानमन्त्री केपी शर्मा ओली बालबालिका भनेपछि  हुरुक्कै हुन्छन् । 

बालबालिकासँग गफिन पाएपछि उनी समय गएको पत्तो पाउँदैनन् । बालबालिकाहरू पनि उनीसँग भेटेपछि छुटिन मान्दैनन् ।  

मंगलवार तिलोत्तमा शंकरनगरस्थित बहुउद्देश्यीय तिलोत्तमा टावरको उद्घाटन गर्न आउँदा उनलाई स्वागत गर्न आएका बालबालिकाहरूसँग ओली गफिए । 

बुटवलकी सुप्रिया पाण्डे र सृष्टि विकलाई ओलीले आफूसँगै मञ्चमा लगे । कार्यक्रमको उद्घाटनमा दियोमा बत्ती बाल्दा पनि आफूसँगै उनीहरूलाई पनि अगाडि सारे । उनीहरूलाई झण्डै ४० मिनेट दायाँबायाँ राखे ओलीले । उनीहरूसँग गफिए । 

बालबालिकासँग गफिएका ओलीको तस्वीर भने एमाले उपाध्यक्ष विष्णु पौडेलले खिचे । 

उनले आफ्नो फेसबुकमा अध्यक्ष ओलीसँग बसेका दुई बालबालिकासहितको तस्वीर पोस्ट गरेका छन् । 

सुप्रियाले बुटवलको न्यू होराइजन माविमा कक्षा १ मा र सृष्टिले गार्गी एकेडेमीमा कक्षा १ मै पढ्छिन् । 

उनीहरू केबी डान्स सेन्टरमा नृत्य पनि सिक्ने गर्छन् । सुप्रियाकी आमा संगिता पाण्डेले ओलीसँग छोरी रमाएर आएको बताइन् ।