वसन्तपुरस्थित ऐतिहासिक गद्दी बैठक पहिलो पटक सर्वसाधारणका लागि खुला गरिएको छ ।

२०७२ वैशाखको विनाशकारी भूकम्पले क्षति पुर्‍याएको गद्दी बैठकलाई नेपाल सरकार र अमेरिकी दूतावास फन्डबाट जीर्णोद्धार गरिएको हो ।

यसअघि कहिल्यै पनि सर्वसाधारणका लागि गद्दी बैठक खुला थिएन तर हरेक वर्ष लाग्ने इन्द्रजात्राको अवसरमा राष्ट्र प्रमुखलाई मात्र गणेश श्री कुमारी र भैरवको प्रत्यक्ष दर्शन गर्नको लागि गद्दी बैठक खुला गरिन्थ्यो ।

चन्द्र शमशेरले विक्रम संवत् १९६५ सालमा युरोपेली शैलीमा निर्माण गरेको गद्दी बैठक कक्षमा विदेशी पाहुनालाई ओहोदाको प्रमाणपत्र दिन र राज्यको महत्त्वपूर्ण बैठकका लागि प्रयोग गरिन्थ्यो । 

पहिलो पटक सर्वसाधारणका लागि खोलिएको ऐतिहासिक गद्दी बैठक सर्वसाधारणले प्रतिव्यक्ति ३० रुपैयाँका दरले शुल्क तिरी अवलोकन गर्ने व्यवस्था मिलाइएको छ ।

यससँगै गद्दी बैठकको तल्लो तलामा रहेका ३ वटा ग्यालरीमा ऐतिहासिक हातहतियार र वृत्तचित्र पनि सर्वसाधारणले अवलोकन गर्न सक्ने हनुमानढोका दरबार संग्रहालयका सूचना अधिकारी मायादेवी अर्यालले जानकारी दिइन् ।

भुइँतलामा एकीकरणदेखि गणतन्त्रसम्मको राजनीतिक परिचय दिने चुच्चे नक्सासम्म विभिन्न किसिमका घटनाक्रम समेटेर प्रदर्शनको व्यवस्था गरिएको छ ।

उक्त कक्षमा पृथ्वीनारायण शाहले प्रयोग गरेका हातहतियार समेत प्रदर्शनमा राखिएका उनले बताइन् । 

भूकम्पपछि गद्दी बैठकको जीर्णोद्धार सम्पन्न गरेर २०७५ असार १३ गते अमेरिकी राजदूतावासले नेपाल सरकारलाई हस्तान्तरण गरेको थियो ।

हेर्नुहोस्, भिडियो :