सशस्त्र प्रहरी बलमा २० दिनका लागि नयाँ आईजीपी चयन गरिने भएको छ ।

वर्तमान (आईजीपी) शैलेन्द्र खनाल चैत २८ गते अनिवार्य अवकाशमा जाने भएपछि २० दिनका लागि आईजीपी चयन गर्नुपर्ने अवस्था आएको हो ।

सशस्त्र प्रहरी अतिरिक्त महानिरीक्षक (एआईजी)द्वय पुष्पराम केसी र रामशरण पौडेलमध्ये एकजना २० दिनका लागि आईजीपी बन्नेछन् ।

२०४९ वैशाख १९ मा प्रहरी निरीक्षक (इन्स्पेक्टर)बाट नेपाल प्रहरीमा सेवा शुरू गरेका दुवै जनाले आगामी वैशाख १८ मा अनिवार्य अवकाश पाउँदैछन् ।

अर्ध सैन्य बल सशस्त्र प्रहरीको मेरिट लिस्टमा केसी एक नम्बर र पौडेल दुई नम्बरमा छन् ।

अहिले केसीले कार्य तथा सीमा सुरक्षा विभाग सम्हालिरहेका छन् भने पौडेलले मानव स्रोत विभाग सम्हालेका छन् । 

सशस्त्र प्रहरीको इतिहासलाई हेर्ने हो भने मेरिटको पहिलो नम्बरमा रहने अधिकृत नै आईजीपी बन्ने गरेको देखिन्छ ।

त्यसपछिको आईजीपी बन्न एआईजीमा बढुवाका लागि दौडधूप

आगामी वैशाख ३० मा हुने स्थानीय तह निर्वाचनअगावै सशस्त्रमा अर्को आईजीपी चयन गर्नुपर्ने हुन्छ ।

अब बन्ने आईजीपीले वैशाख १८ मा अवकाश पाएपछि हालका डीआईजीमध्ये एकजना आईजीपी बन्ने छन् । त्यतिबेला आईजीपी बन्नका लागि अहिले एआईजीमा बढुवा हुन दौडधूप तीव्र छ ।

सशस्त्र प्रहरी नायब महानिरीक्षक (डीआईजी) राजु अर्याल, नारायणदत्त पौडेल र चन्द्रप्रकाश गौतम एआईजीको लाइनमा छन् ।

मेरिटको पहिलो नम्बरमा अर्याल, दोस्रोमा पौडेल र तेस्रोमा गौतम छन् । मेरिटको आधारमा हेर्दा अर्याल एआईजीमा बढुवा भएर वैशाख १८ गते आईजीपी हुने देखिन्छ ।

अर्यालले २ नम्बर छिन्नमस्ता बाहिनीको प्रमुख, उपत्यका बाहिनीको प्रमुख र सशस्त्र प्रहरी प्रवक्ताको जिम्मेवारी समेत सम्हालिसकेका छन् ।