फिनल्यान्डले अबको केही हप्ताभित्र पश्चिमी सैन्य गठबन्धन नेटोमा सहभागी हुनका लागि निवेदन दिन लागेको त्यहाँका पूर्वप्रधानमन्त्री अलेक्जेन्डर स्टबले बताएका छन् । 

रुसले त्यसो नगर्न चेतावनी दिएको भए पनि आफ्नो मुलुक ध्वस्त हुनबाट बचाउन नेटोको सदस्य बन्नैपर्ने स्टबको भनाइ छ । 

सन् २०१४ देखि २०१५ सम्म फिनल्यान्डको प्रधानमन्त्री रहेका स्टबले मे महिनाभित्रमा नेटोको सदस्य बन्ने विषयमा निर्णय लिने बताए । 

एक्सियोस नामक सञ्चारमाध्यमसँग कुराकानी गर्दै उनले भने, ‘रुससँग सम्बन्ध राख्नका लागि प्रयास गरिएको थियो । तर अहिले पुटिनको शासनकालमा त्यस्तो सम्बन्ध असम्भव रहेको देखिएकाले मानिसहरूले धारणा बदलेर नेटोमा प्रवेश गर्ने निर्णय लिएका हुन् ।’

रुसले दिएको चेतावनी तर्साउने प्रयास मात्र भएको स्टबले बताए तर फिनल्यान्डविरुद्ध साइबर आक्रमण बढ्ने सम्भावना रहेको उनले स्वीकार गरे । 

तर रुसी सांसद भ्लादिमिर झाबारोभले आफ्नो देशको विनाशका लागि फिनहरूले नेटो प्रवेशको जोखिम उठाउने सम्भावना नरहेको बताएका छन् ।